U asiarodździ Alaksandra Łukašenki isnuje mahutnaje łobi kančatkovaha razryvu z Rasijaj, jakoje paśladoŭna zajmajecca vyroščvańniem antyrasijski nastrojenaj moładzi. Pra heta na pres-kanfierencyi ŭ Samary zajaviŭ były ministr abarony samaabvieščanaj Danieckaj narodnaj respubliki (DNR), eks-supracoŭnik FSB Rasii Ihar Hirkin, viadomy jak Ihar Strałkoŭ, paviedamlaje «Politnavihator».
«U 2005-m hodzie, vosieńniu, adrazu pa zaviaršeńni apošniaj svajoj čačenskaj kamandziroŭki ja byŭ nakiravany pa abmienie — tam abmien byŭ pamiž ich KDB i našym FSB, i tam try tydni ja byŭ na stažyroŭcy, u Minsku. Za hetyja try tydni ja šmat čaho daviedaŭsia i šmat, čaho ŭbačyŭ, a dalej treba było tolki čytać i šlifavać atrymanuju infarmacyju.
Užo tady, u siaredzinie «nulavych», u Biełarusi išła lićvinskaja prapahanda, vielmi surjoznaja, pa centralnych telekanałach. Skiravanaść hetaj prapahandy była vielmi vyrazna bačnaja, asabliva mnie jak śpiecyjalistu. Padtrymka hetaj lićvinizacyi z boku ŭładaŭ taksama była bačnaja prostym vokam. Ale, viadoma, jana pravodziłasia miakka.
Tahačasnyja biełaruskija kalehi z tych, chto bolš-mienš hatovy byŭ mieć znosiny, tamu što ŭžo tady z boku moładzi adčuvałasia vielmi surjoznaje adčužeńnie, ludzi starejšyja jašče dumali maštabami adzinaj krainy, jany kazali, što ŭ atačeńni Łukašenki isnuje surjoznaje lićvinskaje łobi, prazachodniaje, jakoje zajmajecca ideałohijaj…
Tyja akuratna, nie śpiašajučysia vychoŭvajuć moładź i ŭsio hramadstva ŭ sieparatysckich ad asnoŭnaj Rasii idejach… Upor rabiŭsia na polskaść, na zachad, na katalictva abo ŭnijactva i na «kryvavy carski režym, jaki žorstka zdušyŭ paŭstańnie», — zajaviŭ Strałkoŭ.
Strałkoŭ — adzin z aktyŭnych udzielnikaŭ kanfliktu na Danbasie, eskałacyja jakoha adbyłasia, pa jaho ž pryznańni, praź jaho dziejańni. Jon kiravaŭ apałčeńniem u Słaviansku, paśla čaho ŭkrainskija ŭłady ŭpieršyniu abviaścili ab praviadzieńni ŭ rehijonie antyterarystyčnaj apieracyi. Paśla byŭ ministram abarony «DNR» i kamandujučym jaje armijaj, a taksama adnym ź ideołahaŭ «Navarosii». Jon znachodzicca pad piersanalnymi sankcyjami Jeŭrasajuza i ZŠA, ułady Ukrainy ličać jaho terarystam. U Rasii Strałkoŭ, były vajskoviec i adstaŭny pałkoŭnik FSB, maje status vajennaha piensijaniera, časta vystupaje ekśpiertam na radyjo i ŭ miedyja.
