Niadaŭna na sajcie petitions.by abviaścili zbor podpisaŭ pad zvarotam ab niebiaśpiečnaści hramadskaha transpartu ŭ Minsku.
Kiroŭcy hramadskaha transpartu i pasažyry źviartali ŭvahu na prablemy pracy «Minsktransa». Aŭtobusy i tralejbusy niaredka vychodziać na liniju ź niaspraŭnaściami, kiepska pracujuć dvorniki, fary, śpidomietry i šmat jašče čaho. Zajaŭniki śćviardžajuć: fakty niaspraŭnaściaŭ i parušeńniaŭ prosta ihnarujucca načalstvam. Akramia taho, siarod supracoŭnikaŭ aŭtaparkaŭ praviali atestacyju, karyści jakaja nie dała.
Taksama ŭ pietycyi skazana ab prablemach z adpačynkam kiroŭcaŭ — maŭlaŭ, niaredka pierapynki zusim mizernyja ci ich prosta niemahčyma vykarystać.
Akramia hetaha ŭ pietycyi jašče šmat punktaŭ: skarhi na źmianšeńnie zarobkaŭ, skarhi, što videarehistratary ŭ kabinach vykarystoŭvajucca, kab paśla znajšłasia pryčyna pazbavić kiroŭcu premii, skarhi na biaśpieku pracy…
Na siońnia pad pietycyjaj bolš za 1300 podpisaŭ. Padpisanty patrabujuć, kab u «Minsktransie» praviali detalnuju pravierku.
«My nie admaŭlajemsia ad pracy, my chočam pracavać na technična spraŭnym ruchomym sastavie, chočam narmalnych, zdarovych i biaśpiečnych umoŭ pracy ŭ adpaviednaści z zakanadaŭstvam, jakija adnačasova pavinny harantavać i biaśpieku inšych hramadzian dziaržavy, pasažyraŭ, jakich značna bolš, čym usich nas razam uziatych!» — havorycca ŭ zvarocie.
Ale na padpisantaŭ pietycyi pačaŭsia cisk. U adnym z telehram-kanałaŭ źjaviłasia papiera ź minskaha aŭtaparka №4. Kiroŭcam, jakija padpisali pietycyju, prapanujuć adklikać svoj podpis i piśmova paviedamić pra heta načalstvu.
Navat prapanujuć varyjanty, čamu podpis rabotnika źjaviŭsia pad pietycyjaj: nacisnuŭ z salidarnaści; ź nieaściarožnaści; podpis pastaviŭ za rabotnika chtości ź siamji.
Pazicyja aŭtobusnaha parka pakul nieviadomaja. «Naša Niva» źviarnułasia ŭ administracyju parka, ale tam paviedamili, što ŭ načalstva ŭžo skončyŭsia pracoŭny dzień.