Mnohija biełarusy ličać, što na ŭkrainskich vybarach Zialenski adnaznačna pieramoža, i jaho ŭžo ničoha nie zmoža spynić. Cikava, što va ŭkraincaŭ inšyja mierkavańni na hety kont. Chacia, pavodle adnaho z apošnich apytańniaŭ, Zialenskaha padtrymlivajuć 24,7% i jon lidar honki, tolki 18% apytanych vierać u jaho pieramohu.
Biezumoŭna, Zialenski — adzin z favarytaŭ, i maje realnyja šansy na pieramohu, ale, ja b na miescy ŭsich, nie śpiašaŭsia z vysnovami. Usio bolš skaładana. I voś čamu (vysnovy zasnavanyja na voś hetym apytańni hrupy «Rejtynh»):
— Zialenski maje najbolšy ŭzrovień padtrymki siarod moładzi (jakaja tradycyjna mienš aktyŭnaja na vybarach).
— Elektarat Zialenskaha — samy «nieaktyŭny» siarod elektarataŭ inšych kandydataŭ. Jany mienš za ŭsich uvohule chodziać na vybary. Tolki 52% ludziej z elektaratu Zialenskaha zajavili, što ŭdzielničajuć u kožnych vybarach. Dla paraŭnańnia, siarod amataraŭ Cimašenka i Parašenki takich 78%.
— Zialenski robić svaju prahramu na supraćpastaŭleńni siabie elicie, jak pazasistemny kandydat. Takim čynam za jaho hatovyja hałasavać zaraz 24,7%. Ale lubomu pazasistemnamu kandydatu ciažka ŭ druhim tury (kali Zialenski tudy i vyjdzie) dabirać tyja hałasy, jakija ludzi addavali ŭ pieršym tury za «sistemnaha» kandydata. Karaciej, kali ŭ druhi tur vyjdzie para Cimašenka-Zialenski, Cimašenka zmoža zabrać hałasy ludziej, jakija hałasavali za Parašenku. I ŭ pary Parašenka-Zialenski amatary Cimašenka chutčej addaduć svoj hołas Parašenku, čym Zialenskamu.
— Zialenski maje najlepšyja pakazčyki na Uschodzie i na Poŭdni, i najhoršyja — na Zachadzie, u Haliččynie. Tradycyjna na ŭkrainskich vybarach Haliččyna hałasuje vielmi aktyŭna, u paraŭnańni z Uschodam, i dla Zialenskaha heta surjoznaja prablema. Dy i heta vielmi hramadska-aktyŭny rehijon, jaki ŭ vypadku realnaj sproby Zialenskaha stać prezidentam maksimalna mabilizujecca, kab hetaha nie dapuścić.
— Nie treba zabyvać i pra administracyjny resurs. Va Ukrainie, chacia i jość realnyja vybary, całkam demakratyčnymi ich nazvać nielha. U Cimašenka jość mocnaja partyja z razhalinavanymi ŭstojlivymi rehijanalnymi strukturami, u Parašenki jość kantrol nad Prakuraturaj i SBU. Ničoha padobnaha ŭ Zialenskaha niama. U Zialenskaha niama dastatkova ludziej navat kab zakryć usie vybarčyja kamisii. Cimašenka dziakujučy mocnaj partyi, a Parašenka dziakujučy mocnym strukturam i nacyjanalnym aktyvistam budzie mieć nie pa adnym čałavieku ŭ kožnaj kamisii i naziralnikaŭ na kožnym učastku. Zialenski — nie, i heta va ŭkrainskich umovach moža kaštavać jamu paru pracentaŭ hałasoŭ. Nie dziasiatkaŭ pracentaŭ, kaniečnie, ale pracenty 2 — moža być.
— Jašče kala čverci ludziej nie vyznačylisia z tym, za kaho jany buduć hałasavać. Heta — sapraŭdnaja «čornaja skrynia», jakaja moža jak dabavić jamu hałasoŭ, tak i dapamahčy «tradycyjnym» kandydatam.
— Fienomien Zialenskaha zasnavany ŭ tym liku na jaho pazasistemnaści. I taki imidž lohka padtrymlivać, kali ty nie ŭdzielničaješ u palityčnym žyćci, debatach, palityčnych tok-šou. Ale kali Zialenski vyjdzie ŭ druhi tur, jamu pryjdziecca heta ŭsio rabić. Jamu pryjdziecca ŭziać udzieł u teledebatach. I jak jon prajavić siabie ŭ kłasičnych palityčnych zmahańniach, naprykład, adkrytaj dyskusii ź sistemnym palitykam, — taksama vialikaje pytańnie.
