Deputat parłamienta Čačni ad «Adzinaj Rasii», były ministr abarony niezaležnaj Ičkieryi Mahamied Chanbijeŭ zajaviŭ, što nie lubić ruskich i nie razmaŭlaje ź imi. Pra heta palityk skazaŭ u pramym efiry ŭ Instagram. Videa z pryznańniem apublikavaŭ u Twitter apazicyjanier Alaksiej Navalny.
«Padyšach majho naroda — čačeniec. Ja z ruskimi nikoli nie razmaŭlaju. Ja ruskim nikoli słova nie kažu. Ja nijakamu ruskamu nie zdavaŭsia [padčas vajny ŭ Čačni], — śćviardžaje Chanbijeŭ (pierakład z čačenskaj Navalnaha). — U mianie nie było razmovy ni z adnym ruskim hienierałam, ni z aficeram. I ja ich nie lublu navat siońnia. Ja syn Ičkieryi!»
Taksama jon raskrytykavaŭ prychilnikaŭ Ičkieryi, padkreśliŭšy, što tyja nie majuć maralnaha prava źviartacca da jaho.
Chanbijeŭ u časy niezaležnaj Ičkieryi padtrymlivaŭ ideju stvareńnia niezaležnaj śvieckaj Čačni i vystupaŭ suprać raspaŭsiudžvańnia ŭ Ičkieryi relihijnaha ekstremizmu, ustupajučy ŭ kanflikty z Šamilom Basajevym i lidarami vachabitaŭ. U sakaviku 2004-ha skłaŭ zbroju i zdaŭsia ŭładam.
Na sajcie respublikanskaha parłamienta infarmacyi pra padziei hetaha pieryjadu bijahrafii Chanbijeva niama: tam skazana, što ŭ 1980-ja jon byŭ trenieram pa baraćbie i słužyŭ u hrupie savieckich vojskaŭ u Hiermanii, a z 1994 pa 2005 hod «pracavaŭ na roznych pasadach».
Ičkieryja była samaabvieščanaj respublikaj, jakaja isnavała paśla raspadu SSSR na častcy terytoryi byłoj Čačena-Inhušskaj ASSR u składzie RSFSR. Jurydyčna Ičkieryja spyniła svajo isnavańnie ŭ 2007 hodzie, kali prezident respubliki Doku Umaraŭ abviaściŭ pra stvareńnie «Kaŭkazskaha emirata» («Imarat Kaŭkaz»). Ičkieryja tady stała «viłajatam Nachčyjčo» u składzie novaŭtvareńnia.
