Źjaviŭšysia na teleekranach u kancy 2008 hoda, rasijski telekanał TNT chutka nabyŭ davoli značnuju biełaruskuju teleaŭdytoryju. Adnak u 2011 hodzie vakoł telekanała stali adbyvacca dziŭnyja rečy, u vyniku čaho jon źnik ź biełaruskich kabielnych sietak.
Adnak u 2015 hodzie TNT jak ni ŭ čym nie byvała viartajecca ŭ biełaruskaje televiaščańnie.
Na hety raz kanał atrymaŭ nazvu TNT-International, a jaho biełaruskim retranślataram stała firma TAA «Trya Miedyja». Z aryhinalnaha rasijskaha kantentu stali vyrazać absalutna lubyja zhadki Biełarusi, navat stanoŭčyja.
Biełaruski pravaŭładalnik TNT — pryvatnaja firma TAA «Trya Miedyja» — była zarehistravanaja ŭ kastryčniku 2013 hoda. Jaje dyrektar — Siarhiej Bułacki, pradstaŭnik viadomaj u žurnalisckich kołach dynastyi Bułackich.
U pačatku 1990-ch Bułacki zajmaŭ pasadu namieśnika staršyni Dziaržteleradyjo. Paśla 1994 hodu Siarhiej Bułacki pracavaŭ u Administracyi prezidenta, u 2002-2007 hadach byŭ namieśnikam ministra infarmacyi, paśla čaho staŭ dyrektaram «NTV-Biełaruś».
Kali ŭ 2010 hodzie z efiru «NTV-Biełaruś» vyrazali «Chrosnych baciek», dyrektar telekanała Siarhiej Bułacki prosta admoviŭsia ad kamientaroŭ. Cenzuru na TNT-International jon patłumačyŭ tym, što nibyta heta mižnarodnaja viersija kanała, jakuju redahuje niepasredna rasijski ofis TNT. U rečaisnaści, mižnarodnaj viersijaj kanała źjaŭlajecca TNT-Comedy, adkul kantent, naturalna, nie vyrazali. TNT-International — vyklučna biełaruskaja redakcyja kanała.
Asnoŭnymi dalami ŭ pravie ŭłasnaści vałodajuć dvoje viadomych hramadzian Biełarusi: Siarhiej Ciacieryn (trymalnik 40% doli TNT-International) i Volha Miniec (39.9% doli). Astatniaja častka ŭłasnaści kampanii naležyć firmie TAA «AMH-Inform», vynikaje z danych Adzinaha dziaržaŭnaha rehistra jurydyčnych asob.
Siarhiej Ciacieryn u rozny čas zajmaŭ pasady pieršaha namieśnika ministra sportu, pamočnika prezidenta, vice-prezidenta Nacyjanalnaha alimpijskaha kamiteta.
Siarhiej Ciacieryn — źleva, fota: Tut.by.
Ciapier Siarhiej Ciacieryn uznačalvaje Biełaruskuju tenisnuju fiederacyju.
Volha Miniec bolš viadomaja hramadskaści jak śpiavačka Alesia.
Darečy, muž Alesi, biznesmien Leanid Miniec, vałodaje telekanałam «BiełMuzTV», jaki atrymaŭ licenziju na pradukcyju kanała TNT4 i ciapier tranśluje archiŭnyja prahramy i rannija siezony sieryjałaŭ TNT. Dyrektaram kanała «BiełMuzTV» źjaŭlajecca Alaksandr Kapionkin, što ŭznačalvaŭ hałoŭnuju dyrekcyju «Biełaruś-1»
Ale i heta jašče nie ŭsio. «BiełMuzTV» i «TNT-International» uvachodziać u adziny chołdynh, hiendyrektaram jakoha da niadaŭniaha času źjaŭlaŭsia eks-muž eks-pamočnicy prezidenta Natalli Piatkievič, były namieśnik kiraŭnika Biełteleradyjokampanii i kiraŭnik ATN, a ciapier — dyrektar «Biełaruś-24» Alaksandr Martynienka.
