Walt Disney Co. zaviaršyła ŭhodu pa nabyćci asnoŭnaj častki aktyvaŭ karparacyi 21st Century Fox za $ 71,3 miljarda dalaraŭ.
Kampanija Boba Ajhiera atrymała ŭ svajo kiravańnie kinastudyju i telekampaniju Fox, telesietku FX, telekanały siamiejstva National Geographic, indyjskaha televizijnaha hihanta Star India i dadatkovuju 30-pracentnuju dolu ŭ stryminhavym servisie Hulu. Apošniaja pavialičvaje dolu Disney u strymierach da 60% (astatnim vałodajuć Comcast i Warner Media).
Pahłynańnie prajšło nie tak hładka, jak płanavałasia. Čakajecca, što jano paciahnie za saboj masavyja skaračeńni ŭ halinie: pracu mohuć stracić ad 4 tys. da 10 tys. čałaviek. Akramia taho, Disney abaviazali pradać 22 rehijanalnyja spartyŭnyja telesietki ŭ ZŠA i spartyŭnyja telesietki ŭ Brazilii i Mieksicy, a ŭ Jeŭropie kampanija pavinna pazbavicca ad doli ŭ takich sietkach, jak Lifetime i History.
Analityki z Uoł-stryt i inšyja ekśpierty bačać u ździełcy jak plusy, tak i minusy. Dla Disney jana daje stratehičnyja pieravahi, pavyšajučy kolkaść jaje kantentu i jaho raznastajnaść, a taksama ahulnuju hłabalnuju moc karparacyi. Adnak nastupstvy takoha vydatkovaha nabyćcia, naroŭni z vydatkami na zapusk ułasnaha stryminhavaha videaservisu Disney+, jašče doŭha buduć niehatyŭna ŭpłyvać na finansavuju spravazdačnaść. Zrešty, bole dakładnyja prahnozy źjaviacca tolki da 11 krasavika, kali karparacyja prezientuje Disney+ inviestaram.
