Žurnalist «Radyjo Svaboda» Vital Cyhankoŭ u svaim fejsbuku padzialiŭsia historyjaj, jak nie zapłaciŭ za prajezd u hramadskim transparcie — i nie zapłaciŭ štraf, kali jaho złavili kantralory. U kamientarach pačali abmiarkoŭvać situacyju, dałučyłasia i Taćciana Karatkievič.
«Zajcaŭ» lublu;) ŭžo nie raz sustrakaju takija historyi, kali ludzi svoj pratest vykazvajuć i takim čynam. Majuć prava», — napisała Karatkievič.
«Naša Niva» vyrašyła pacikavicca ŭ eks-kandydatki ŭ prezidenty, jak bieźbiletny prajezd źviazany z pratestam.
«Kali ja kažu «majuć prava», heta ž jašče nie značyć, što ja ich padtrymlivaju. Ludzi prosta iduć na pratest i musiać razumieć, što za heta niasuć adkaznaść, — razvažaje Taćciana Karatkievič. — Prosta ja niaredka sustrakajusia z roznymi ludźmi i niekatoryja, kali zachodzić pytańnie pra takija sacyjalnyja rečy ci prablemy, vykazvajucca. U nas była sustreča ź vielmi pavažanymi ludźmi, paetami i piśmieńnikami. I adzin čałaviek — nie budu ahučvać imia, ale heta piśmieńnik z vysokim statusam — skazaŭ, što pryncypova nie apłočvaje prajezd.
I jość ludzi, jakija kažuć, što nie padtrymlivajuć uładu i nie zhodnyja z tym, jak raźmiarkoŭvajucca hrošy. Tamu nie płaciać».
Ale ŭ čym pratest? Karatkievič patłumačyła tak:
«Nu a jak nie płacili ludzi padatak za darmajedaŭ? Ludzi nie płaciać, takim čynam jany pratestujuć. Ci kali ludzi atrymlivajuć vialikija štrafy i taksama ich nie apłočvajuć».
Ale ž heta nie štraf na pustym miescy, a admova płacić za pasłuhu, jakuju im akazvaje «Minsktrans» i kankretny kiroŭca. Ci pratest tady kraści z kramy?
«Kraści z kramy — heta inšaje. Ty biareš čužoje», — adkazała Karatkievič.
Paśla palityk padsumavała svaje słovy:
«Ja nie kažu, što [nie płacić za prajezd] heta nie parušeńnie. Ja za toje, kab usie płacili i adčuvali, što płaciać i mohuć pradstaŭlać svaje zaŭvahi, majuć prava patrabavać bolš jakasnych pasłuh. Kali ludzi hetaha nie adčuvajuć, jany sychodziać u taki pratest.
Majuć prava. Ale heta nie značyć, što ja ich padtrymlivaju ci zaklikaju heta rabić. Prosta ja baču, što tak pavodziać siabie našy hramadzianie. Ale jany musiać viedać, što za heta ich aštrafujuć i budzie administratyŭnaja adkaznaść.
Z majho punktu hledžańnia, heta pratest, ale jon biezvynikovy. Voś kali ty apłočvaješ i paśla pytaješsia — heta inšy padychod».
Sama Taćciana Karatkievič, pa jaje słovach, prajezd apłačvaje. Byli vypadki, kali jaje štrafavali za adsutnaść kvitka, ale heta byŭ nie pratest ź jaje boku.
«Byvała, što prajazdžała adzin prypynak, nie paśpiavała nabyć kvitok», — rastłumačyła jana.
