Toje, što ŭ siłavych orhanach vielmi chutka adbudziecca ratacyja, užo nie sakret: pra heta ŭ adkrytuju havorać unutry viedamstvaŭ.
Z čym toje źviazanaje? Sakratar Rady biaśpieki Stanisłaŭ Zaś miarkuje pierajści na rabotu ŭ ADKB, jašče niekatoryja kiraŭniki vychodziać na piensiju abo ciažka chvarejuć. Vynikam stanie łancuh pierastanovak.
Praŭda, Armienija, jakaja ŭpierłasia roham i nie pahadžajecca na Zasia, raźličvaje pasadzić svajho čałavieka, trochi pabłytała karty biełaruskim siłavikam — mnohija ŭžo paśpieli prymieryć čužyja pahony i ŭjavić siabie ŭ novych kresłach, jak raptam armianie zajavili, što ličać Zasia «łabistam Azierbajdžana», bo pry im Biełaruś pradała Baku «Pałanezy».
Takim čynam, vyrašanaja sprava raptam pieraŭtvaryłasia ŭ niapeŭnuju, z mahčymaściu pierahulvańniaŭ. Dyk chto tady kudy? My skłali nievialiki śpis najbolš imaviernych pierajemnikaŭ ciapierašnich kiraŭnikoŭ siłavych viedamstvaŭ.
Rada Biaśpieki: Karajeŭ, Arčakoŭ i Vakulčyk
U Radu Biaśpieki patrebny taki čałaviek, čyja kampietencyja nie zamykałasia b na niejkaj adnoj siłavoj śpiecyjalizacyi: vajennaj ci śpiecsłužbisckaj — i ŭ toj ža čas čałaviek, u jakoha nie mohuć raptam razharecca palityčnyja ambicyi.
Z hetaj pazicyi idealnaj u vačach Alaksandra Łukašenki vyhladaje kandydatura hienierał-majora Juryja Karajeva, jaki ciapier uznačalvaje Unutranyja vojski MUS.
U namieśnikach ministra ŭnutranych spraŭ Karajeŭ z 2012 hoda, jon prafiesijny śpiecnazaviec.
Pra toje, što Karajeŭ pojdzie na pavyšeńnie ŭ Radu biaśpieki, čutki chadzili ŭžo daŭno, kali nichto nie moh pradkazać revalucyju ŭ Armienii i nastupnaje adklikańnie ich pradstaŭnika ŭ ADKB.
Viadoma, što Juryj Chadžymuratavič naradziŭsia ŭ Asiecii, a ŭ Biełaruś trapiŭ paśla savieckaj vučelni.
«Našaj Nivie» jon niejak raskazvaŭ, što va Unutranych vojskach sałdatam raskazvajuć pra historyju Biełarusi, jaje słaŭnaje minułaje.
Karajeŭ vyhladaje samaj mocnaj kandydaturaj, ale skłaści jamu kankurencyju mohuć niekalki čałaviek. Siarod ich ciapierašni kiraŭnik KDB Valeryj Vakulčyk.
Vakulčyk taksama maje dośvied hvardziejskaj słužby, a nie tolki śpiecsłužbisckaj. Jon dobry arhanizatar, što zaśviedčyŭ u novastvoranych Apieratyŭna-analityčnym centry i Śledčym kamitecie.
Jašče adnym imaviernym pierajemnikam Zasia moža vyhladać Uładzimir Arčakoŭ, pryznačany namieśnikam kiraŭnika Rady biaśpieki ŭ lutym 2014-ha.
Uładzimir Arčakoŭ.
Z taho času Arčakoŭ dasłužyŭsia z pałkoŭnika da hienierała. Jon źjaŭlajecca adnym z aŭtaraŭ pryniataj niadaŭna Kancepcyi infarmacyjnaj biaśpieki. Arčakoŭ časta źjaŭlajecca ŭ ŚMI — niadaŭna jon daŭ doŭhaje intervju dla siužeta adnaho ź dziaržaŭnych kanałaŭ.
Hety čałaviek naradziŭsia ŭ Jekaciarynburhu, pieršuju vajskovuju adukacyju atrymlivaŭ tam ža.
Pa vodhukach tych, chto mieŭ z Arčakovym asabisty kantakt, heta čałaviek prarasijskich pohladaŭ.
MUS: Barsukoŭ, Daroška
Pierajemnikam Šunieviča moža stać jahony namieśnik, hienierał-major Alaksandr Barsukoŭ.
Barsukoŭ trapiŭ u namieśniki z pasady načalnika minskaj milicyi, jakuju ciapier uznačalvaje Siarhiej Daraško.
Voś hety Daraško taksama ličycca mocnym kandydatam u kresła Šunieviča.
Raniej jon byŭ načalnikam słužby vykanańnia pakarańniaŭ, mienavita jamu prypisvajecca ideja stvaryć u Biełarusi kałhasy, dzie b pracavali asudžanyja i tyja, chto vyjšaŭ, ale nie znajšoŭ siabie.
Unutranyja vojski: Siarhiej Chamienka
U pierajemniki Karajeva, kali toj pojdzie ŭ Radu biaśpieki, prahnazujecca Siarhiej Chamienka, načalnik departamienta achovy.
Chamienka naradziŭsia ŭ Danieckaj vobłaści.
KDK: Vakulčyk
Kali Valeryj Vakulčyk nie budzie pryznačany ŭ Radu biaśpieki, to jon moža trapić i ŭ Kamitet dziaržkantrolu, jaki pakul uznačalvaje niemałady ŭžo Leanid Anfimaŭ.
Vakulčyk užo nabiŭ sabie ruku na łoŭli karupcyjanieraŭ i vyjaŭleńni złoŭžyvańniaŭ dziaržaŭnaj majomaściu, tamu śpiecyfika raboty naŭrad ci budzie dla jaho novaj.
KDB: Paŭlučenka, Šunievič
Uznačalić Kamitet dziaržaŭnaj biaśpieki, kali adtul raptam sydzie Vakulčyk, moža Andrej Paŭlučenka, jaki siońnia ŭznačalvaje samuju zahadkavuju biełaruskuju śpiecsłužbu Apieratyŭna-analityčny centr.
Paŭlučenka maje vializny davier Alaksandra Łukašenki: jon byŭ načalnikam słužby achovy prezidenta, a na mierapryjemstvie ŭ Opiernym da 100-hodździa dypłamatyčnaj słužby, naprykład, siadzieŭ pobač ź Viktaram Łukašenkam, asobna ad inšych siłavikoŭ.
Jašče adnym imaviernym pierajemnikam Vakulčyka moža vyhladać Ihar Šunievič, jaki maje dośvied raboty ŭ KDB.
Praŭda, kažuć, što praz peŭnyja abstaviny, Šunievič sam nie choča novych vysokich pasad.
Čakajucca źmieny i na čale sudziejskaha korpusa. Jak pisaŭ telehram-kanał «Kulhavy djabał», čyje prahnozy niaredka spraŭdžvalisia, Kanstytucyjny sud moža ŭznačalić Ała Badak. A ŭ kiraŭniki Viarchoŭnaha Suda zamiest niemaładoha ŭžo Valancina Sukała mohuć pierasieści abo hienprakuror Kaniuk (pracavaŭ ža jon niekali sudździoj), abo staršynia Jeŭrazijskaha ekanamičnaha suda Alaksandr Fiedarcoŭ, abo daśviedčany namieśnik Sukała Kalinkovič.
