U Mahilovie sud vynies pryhavor 25-hadovaj trenieru-vykładčyku abłasnoha centra alimpijskaha reziervu pa viaślarnych vidach sportu Irynie Karatkovaj. Jaje pryznali vinavataj u słužbovaj niadbajnaści, jakaja pryviała da śmierci dziciaci pa nieaściarožnaści. U Karatkovaj na treniroŭcy ŭ letnim łahiery patanuŭ 14-hadovy školnik. Maralnuju škodu na karyść baćkoŭ zahinułaha sud pastanaviŭ spahnać z ustanovy, a nie z treniera, piša Tut.by
— Sud prysudziŭ treniera-vykładčyka da 3 hadoŭ pazbaŭleńnia voli ŭ kałonii va ŭmovach pasialeńnia z pazbaŭleńniem prava zajmacca vykładčyckaj dziejnaściu na praciahu 5 hadoŭ, - raspaviała Tut.by staršy pamočnik prakurora Mahiloŭskaj vobłaści Alena Šumiejka. — Prysud u zakonnuju siłu nie ŭstupiŭ i moža być abskardžany.
Baćki školnika zajaŭlali pazoŭ da Centra alimpijskaha reziervu na kampiensacyju maralnaj škody ŭ pamiery 100 tys. Rubloŭ. Sud zadavoliŭ pazoŭ častkova, pastanaviŭšy spahnać z ustanovy 60 tys. rubloŭ. Pa słovach Aleny Šumiejka, ustanova paśla moža spahnać hetuju sumu z treniera.
Trenier zastajecca pad padpiskaj ab niavyjeździe. U jaje jość 6-hadovy syn.
Što zdaryłasia
Na treniroŭcy 26 červienia 2018 hoda školnik byŭ ź inšymi vychavancami Mahiloŭskaha abłasnoha centra alimpijskaha reziervu pa viaślarnych vidach sportu, ale trochi adstaŭ ad ich. Trenier supravadžała dziaciej na matornaj łodcy i była kala asnoŭnaj hrupy, kali łodka chłopčyka pierakuliłasia. Padletak byŭ biez vyratavalnaj kamizelki.
Heta bačyŭ rybak na bierazie. Jon spytaŭ u chłopčyka, ci patrebna jamu dapamohu. Toj admoviŭsia, skazaŭ, što sam spravicca. Adnak mužčyna ŭsio roŭna patelefanavaŭ u MNS. Vyratavalniki vyjechali na vyklik, mužčyna zhubiŭ dzicia z-pad uvahi. Cieła chłopčyka znajšli niedaloka ad miesca, dzie jaho apošni raz bačyŭ rybak.
Pa viersii śledstva, trenier dapuściła niepaŭnaletniaha spartsmiena-navučenca da vučebna-trenirovačnaha zaniatku na adkrytaj vadzie biez pryniaćcia zaliku pa płavańni, nie aznajomiła jaho z praviłami techniki biaśpieki. Pry hetym vyratavalnuju kamizelku chłopčyku vydali, ale na vadu jon spuściŭsia bieź jaje. A dahaniać hrupu staŭ pa ŭkazańni treniera. Padčas treniroŭki školnik vyjšaŭ z zony spartyŭnaj akvatoryi, pryznačanaj dla hrup pačatkovaj padrychtoŭki.
Zahinuły padletak vučyŭsia ŭ himnazii № 1 i byŭ adzinym dziciem u siamji.
Jak raspaviadaŭ Tut.by baćka zahinułaha Jaŭhien, chłopčyk pajšoŭ zajmacca viesłavańniem ŭ kancy lutaha — pačatku sakavika 2018 hoda. Kali ŭ mai chłopcy ŭpieršyniu vyjšli na vadu, jany byli ŭ składzie čaćviorak, heta značyć u łodcy byli trenier Karatkova i try maładyja vieślary. Školnik pačaŭ pakazvać dobryja vyniki, i trenier stała zajmacca ź im asobna, a paśla, pa słovach baćki, i zusim dazvalała treniravacca samastojna.
U baćki jość svajo bačańnie taho, što adbyłosia. Jaŭhien ličyć, što jaho synu prosta nie chapiła sił vybracca na bierah razam z łodkaj. A jaje jon nie kinuŭ, bo bajaŭsia, što na jaho za heta nie svarylisia.
