U časie Fiestyvalu intelektualnaj knihi «Pradmova», jaki prajšoŭ u roznych haradach Biełarusi, adbyłasia sotnia imprezaŭ z udziełam dziasiatkaŭ tvorcaŭ. Hledačy mahli pasłuchać paetaŭ, prazaikaŭ, myślaroŭ, nabyć samyja novyja vydańni i biestsielery.
«Akademkniha» prapanuje paznajomicca z knihami, jakija karystalisia najbolšym popytam padčas fiestyvalu.
Viktar Marcinovič. Mova
Minsk, 4741 hod pa kitajskim kalendary. Časy Smutku skončylisia, nadyšła era ŭzvyšeńnia Sajuznaj dziaržavy Kitaja i Rasii, bieskłapotnych uciechaŭ, šopinh-relihii i cold sex'u. Adnak isnuje Niešta, čaho ŭ hetym hramadstvie sucelnaha dabrabytu nie staje jak vady i pavietra. Sientymientalny kantrabandyst Siaroža pad stracham śmiarotnaha pakarańnia ŭvozić kaštoŭny skarb z-za miažy i apynajecca pad pilnym kantrolem minskaha padpolla, uznačalenaha kitajskaj mafijaj pad kiraŭnictvam tajamničaj Ciotki. Razam jany sprabujuć złamać sistemu, u jakoj dabro i zło, aśvietniki i złačyncy, kachańnie i spažyvańnie, viernaść i zdrada pamianialisia miescami.
Ci možacie vy ŭjavić Biełaruś bieź Biełarusi? Hety raman — strašny son pra budučyniu, praduchilić jakuju možna tolki ŭ łučnaści z tym skarbam, vakoł jakoha i raspačynajecca dziejańnie hetaha linhvistyčnaha bajevika.
Heta ŭžo treciaje vydańnie knihi Viktara Marcinoviča.
Andruś Horvat. Radziva «Prudok»
Žurnalist, dvornik, darmajed, haspadar, piśmieńnik. Aŭtar hetaj knihi — čałaviek, jaki šukaje svaje miesca ŭ hetym śviecie. Takim miescam mahła stać utulnaja redakcyja staličnaha časopisa abo modny chipstarski kavorkinh. Ale stała dziedava chata na Paleśsi, na ŭskrajku Biełarusi, na skryžavańni suśvietaŭ.
Heta kniha nie pra toje, jak adnavić napaŭrazburany dom, sadzić aharod, daić kazu, žyć u vioscy i nie śpicca. Heta kniha pra toje, jak adnavić napaŭrazburanaha sabie.
Kim. Vielikij prochožij, vierojatnyje istorii
Układalniki Alaksandr Suškoŭ, Alena Budzinajcie.
Heta ŭnikalnaje vydańnie: vialikaja pamiatnaja kniha z tekstami, vieršami, intervju, redkimi fotazdymkami i archiŭnymi dakumientami.
Zbornik źjaŭlajecca śviedčańniem žyvoj i hłybokaj cikavaści da asoby Kima Chadziejeva (1929-2001) - lehiendarnaha minčuka, jaki dziesiacihodździ źbiraŭ vakoł siabie intelektualnuju elitu horada.
U 2019 hodzie Kimu spoŭniłasia b 90 hadoŭ. Bolš za piaćdziesiat natchnionych raskazčykaŭ udzielničali ŭ sprobie ŭznavić jaho šmathranny, supiarečlivy i składany vobraz.
Michaił Aniempadystaŭ. Koler Biełarusi
«Koler Biełarusi» — adna ź pieršych sprobaŭ vizualizavać kałarystyku biełaruskaj minuŭščyny i sučasnaści ź jaje jaskravymi kolerami i adcieńniami, z pryrodnymi strukturami, narodžanymi pad uździejańniami troch stychij.
Dyzajnierski albom «Koler Biełarusi» staŭ apošniaj vialikaj pracaj vybitnaha dyzajniera, mastaka i paeta Michaiła Aniempadystava.
U knizie apisanyja siem koleraŭ, jakimi «pafarbavanaja» biełaruskaja kultura: bieły, čorny, čyrvony, sini, šery, załaty i zialony. Kožny «encykłapiedyčny artykuł» prailustravany dziasiatkam fota, dzie zafiksavanaja prysutnaść koleru ŭ pryrodzie i ŭ materyjalnaj kultury.
Čamu «krasnym» u Biełarusi nazyvali zialony koler? Čamu čorny nam nie strašny? Što jadnaje šery i zialony? Jak źviazany čyrvony koler z raźvićciom technałohij?
Adkazy na hetyja i šmat inšych pytańniaŭ možna znajści ŭ knizie.
Ludmiła Rubleŭskaja. Avantury Vyrviča z bandy Čornaha Doktara
Raman pryhodnicki i fantasmaharyčny.
Heta piataja kniha ramana, u jakoj praciahvajucca nievierahodnyja pryhody hierojaŭ i adkryvajucca nieviadomyja staronki biełaruskaj historyi ŭ hady paśla pieršaha padziełu Rečy Paspalitaj.
Hierojaŭ čakajuć sutareńni Ašmianskaha zamka, palot na cmoku nad karnavalnaj Vieniecyjaj, śniežnaja łavina ŭ Tatrach, haściavańnie ŭ Pacučynaha Karala i žaleznaja kletka ŭ zamku akrutnaj Terezy Radzivił…
Nabyć heta, a taksama inšyja novyja vydańni i biestsielery, možna ŭ kniharni «Akademičnaja kniha» (pr. Niezaležnaści, 72).
RUP «Akademičnaja kniha» UNP 101462648