Dyrektar i zahadčyk adździeła adnaho z mahazinaŭ u Sierabrancy, jaki naležyć bujnoj handlovaj sietcy, zmahalisia z vykradalnikami tavaru svaimi mietadami: ździekavalisia ź ich u padsobcy, a paśla absalutna hołymi vyhaniali na vulicu.
Pra heta piša «Minsk-Naviny» sa spasyłkaj na prakuraturu Leninskaha rajona.
Daviedalisia pra historyju, kali minaki zaŭvažyli, jak z kramy vybieh hoły čałaviek.
Vyklikali milicyju. Paciarpiełym akazaŭsia 38-hadovy minčuk, raniej nieadnarazova sudzimy za rabavańni i niaspłatu alimientaŭ. U kramie jon sprabavaŭ skraści butelku harełki, schavaŭšy jaje pad adzieńniem. Adnak heta zaŭvažyli pradaŭcy.
Mužčynu zaviali ŭ padsobnaje pamiaškańnie, dzie zahadčyk adździeła razam z dyrektaram zładzili samasud: stali źbivać, puściŭšy ŭ chod małatok. Akramia taho, jany patrabavali pakryć škodu ad vykradzienych raniej tavaraŭ, da jakich niebaraka nie mieŭ nijakaha dačynieńnia. Zatym rabotniki handlu prymusili jaho raspranucca dahała i vypchnuli ŭ takim vyhladzie na vulicu, zamknuŭšy za im dźviery.
Druhim paciarpiełym pa hetaj spravie prachodzić 54-hadovy minčuk, jaki taksama maje bahatuju złačynnuju bijahrafiju: sudzimy až dzieviać razoŭ.
U kramie jon sprabavaŭ vykraści butelku nastojki. Jaho napatkaŭ taki ž los, što i pieršaha hieroja. Akramia źbićcia i vymahalnictvaŭ, abvinavačanyja pluchnuli jamu ŭ tvar kavy, a paśla hałyšom vypravadzili na vulicu.
Kab achviary nie akazvali supracivu, ich źviazvali i zalaplali skotčam rot. Va ŭsich achviaraŭ samasudu šmatlikija siniaki i rany, u adnaho mužčyny złamany nos.
Pravaachoŭniki nie vyklučajuć, što paciarpiełych pa hetaj kryminalnaj spravie kudy bolš, ale astatnija pabajalisia źviartacca ŭ milicyju, bo ździejśnili ŭ kramie kradziež.
Darečy, sam 40-hadovy dyrektar kramy niekali byŭ sudzimy za hvałt u dačynieńni da inśpiektara DAI. Jaho 30-hadovy kaleha pryciahvaŭsia da kryminalnaj adkaznaści za ŭchileńnie ad vajskovaha pryzyvu.
Kryminalnaja sprava nakiravanaja dla razhladu ŭ sud.
