Dźvie krainy Jeŭrasajuza admovilisia ŭpuścić sudna «Siadoŭ» z Rasii, bo na im znachodzilisia kursanty z anieksavanaha Kryma, piša DW.
Estonija i Polšča zabaranili rasijskamu navučalnamu parusnamu sudnu «Siadoŭ» uvajści ŭ ich terytaryjalnyja vody.
Talin nie vydaŭ «Siadovu» dazvoł, pakolki na jaho borcie znachodzilisia niekalki kursantaŭ Kierčanskaha dziaržaŭnaha marskoha technałahičnaha univiersiteta, jaki raźmieščany na terytoryi anieksavanaha Rasijaj ukrainskaha paŭvostrava Krym, patłumačyła ministerstva zamiežnych spraŭ Estonii.
Polšča 12 krasavika pastupiła anałahičnym čynam. Premjer-ministr hetaj krainy Mateuš Maraviecki asabista admoviŭ «Siadovu» va ŭvachodzie ŭ port Hdyni. Pradstaŭnik polskaha MZS Eva Suvara zajaviła, što ŭ kursantaŭ «rasijskija, a nie ŭkrainskija pašparty, a Polšča, jak i bolšaść dziaržaŭ Zachadu, nie pryznaje anieksii Kryma i z hetaj pryčyny nakłała sankcyi na Rasiju».
