18 krasavika va ŭsim śviecie pa inicyjatyvie JUNESKA adznačajecca Mižnarodny dzień pomnikaŭ i miaścinaŭ. U Biełarusi heta śviata hodna adznačajecca dziakujučy praviadzieńniu ŭ krasavickija dni Festa ekskursavodaŭ, padčas jakoha možna trapić na samyja raznastajnyja i ŭnikalnyja aŭtarskija ekskursii pa ŭsioj krainie.
Prahrama Festa na sajcie
Ideja Festa naradziłasia ŭ 2009 hodzie ŭ asiarodku nieabyjakavych da historyi ludziej, i z hoda ŭ hod jon pašyrajecca i vyklikaje vialikuju cikavaść u naviedvalnikaŭ. Adbyłosia ŭžo 9 fiestyvalaŭ, jakija naviedali tysiačy ŭdzielnikaŭ, prajšli sotni cikavych raznapłanavych ekskursij. Za hety čas u Festa źjavilisia pastajannyja naviedvalniki i šmatlikija prychilniki. «Śviata ekskursij» — taki vodhuk možna pačuć ad ich pry nabližeńni čarhovaha Festa ekskursavodaŭ. My vielmi ŭdziačny ekskursavodam, krajaznaŭcam, jakija stała padtrymlivajuć mierapryjemstva i dzielacca ŭnikalnymi viedami dziela taho, kab zapalić u biełarusach ahieńčyk lubovi da svajoj historyi i pavahu da śviedčańniaŭ minułaha.
U čym ideja Festa ekskursavodaŭ?
Kožny dzień, idučy na pracu ci zaniatki, my abminajem unikalnyja pomniki kultury, architektury, pryrody, ale navat nie zdahadvajemsia pra heta. Dziakujučy Festu ekskursavodaŭ źjaŭlajecca mahčymaść pa-inšamu zirnuć na štodzionnyja rečy i pieramianić svajo staŭleńnie da spadčyny.
Jakija vandroŭki prapanuje Fest?
Ekskursavody źviernuć vašu ŭvahu nie tolki na vieličnyja zamki i manumientalnyja pałacy, ale i na darahija sercu nievialikija damki, zaniapałyja siadziby — usio, što stvaraje niepaŭtornaść rodnaha kraju. U miežach Festa nie redkaść — litaraturnyja vandroŭki, chramavyja ekskursii (pa śviatyniach roznych kanfiesij), rovarnyja maršruty. Asobna z dapamohaj śpiecyjalnych aŭdyjo-taktylnych makietaŭ prachodziać u miežach Festa vandroŭki dla ludziej z parušeńniami zroku i słychu.
U čym sakret papularnaści Festa ekskursavodaŭ?
Stalica Biełarusi i rehijanalnyja harady na niekalki dzion pahružajucca ŭ svojesablivuju, ni na što nie padobnuju atmaśfieru historyi, tajamnic i lehiend. Časam ekskursii supravadžajucca animacyjnymi prahramami, jakija dadajuć vandroŭkam malaŭničaści i šarmu.
Kolki kaštujuć ekskursii u miežach Festa?
Ekskursii padčas Fiestyvalu adbyvajucca biaspłatna. Takim čynam my imkniemsia stvaryć ahulnaje śviata i prakłaści svaju darohu da Spadčyny tym, chto, mahčyma, upieršyniu sustreŭsia ź joj. Ale nam budzie pryjemna, kali paśla Festa vy zachočacie zamović tuju ci inšuju ekskursiju va ŭpadabanaha hida na kamiercyjnaj asnovie.
Dzie pravodzicca Fiestyval?
Fest ekskursavodaŭ najbolš maštabna adbyvajecca ŭ Minsku. Ale štohod da Festa dałučajucca abłasnyja i rajonnyja centry. Navat u addalenych viosačkach roznych rajonaŭ mohuć adbyvacca vandroŭki ŭ miežach Festa ekskursavodaŭ. Taksama adbyvajucca špacyry pa zamiežnych haradach, jakija źviazany z historyjaj Biełarusi (za hety čas adbylisia vandroŭki pa Vilni, Maskvie, Krakavie, Prazie i inš.).
Jak paŭdzielničać u Feście?
Samaje prostaje — vyjści na bližejšuju ekskursiju, jakaja budzie adbyvacca ŭ vašym rajonie (śpis ekskursij 2019 hoda źjavicca za niekalki dzion da samoha Fiestyvalu). Arhanizatary Festa pierakanany: najpierš nieabchodna źviedać svoj rajon, admietnaści svajoj miascovaści, ułasnyja pomniki. Adnak kali takoj ekskursii ŭ bližejšym da vas rajonie niama, to možna dałučacca da inšych.