6 krasavika ŭ Łondanie pamierła brytanskaja linhvistka, daśledčyca słavianskich i ciurkskich movaŭ i litaraturaŭ, ekśpiert pa Centralnaj Azii Šyryn Akiner, piša Radyjo Svaboda.

Šyryn Akiner naradziłasia ŭ 1943 hodzie ŭ horadzie Daka ŭ tahačasnaj Brytanskaj Indyi. Vučyłasia ŭ Łondanskim univiersitecie, dzie vyvučała słavianskuju fiłałohiju i tureckuju movu i litaraturu. U 1980 hodzie abaraniła daktarat na temu «Relihijnaja leksika tatarska-biełaruskaha kitaba sa zboraŭ Brytanskaj biblijateki».

Vykładała ŭ Škole ŭschodnich i afrykanskich daśledavańniaŭ. U 2013 hodzie była ŭhanaravanaja premijaj imia Čynhiza Ajtmatava za šmathadovaje vyvučeńnie rehijonu.

Z 1970-ch hadoŭ Šyryn Akiner, pracujučy nad daktaratam, padtrymlivała ciesnyja kantakty z brytanskimi biełarusami, pieradusim ź Biełaruskaj biblijatekaj imia Franciška Skaryny i jaje kiraŭnikom ajcom Alaksandram Nadsanam.

Šyryn Akiner naležyć zasłuha aznajamleńnia anhłamoŭnaha śvietu z duchoŭnaj spadčynaj biełaruskich tataraŭ — kitabami (knihi, napisanyja na biełaruskaj movie arabskim piśmom). Jaje pracy publikavalisia ŭ vydavanym u Łondanie navukovym časopisie «The Journal of Byelorussian Studies».

Aprača taho jana daśledavała tvorčaść biełaruskich piśmieńnikaŭ u Polščy. U 1982 hodzie ŭ Biełastoku vyjšła jaje praca «Sučasnyja biełaruskija piśmieńniki ŭ Polščy», a ŭ 1984 hodzie ŭ Łondanie — kniha «Minijaciury» Sakrata Janoviča pa-biełarusku i pa-anhlijsku (u jaje pierakładzie i ź jaje pradmovaj).

Pachavańnie Šyryn Akiner adbudziecca ŭ Łondanie 7 maja.

Клас
0
Панылы сорам
0
Ха-ха
0
Ого
0
Сумна
0
Абуральна
0