U Vialikuju subotu ŭ Ijerusalimie ŭ Chramie Truny Haspodniaj syšoŭ Žyvatvorny ahoń. Patryjarch Jerusalimski Fieafił III 27 krasavika vyjšaŭ z kaplicy z zapalenymi śviečkami. Paśla hetaha prysutnyja ŭ śviatyni zapalili śviečki ad jaho ahniu.
Dalej vierniki śpiecrejsami paviazuć połymia hetaha ahniu ŭ svaje krainy, pieradaje ANT.
Žyvatvorny ahoń sychodzić u kaplicu nad Trunoj Haspodniaj — Kuvukliju. Padrychtoŭka da cyrymonii pačynajecca z ranicy. Spačatku kaplicu ahladajuć i apiačatvajuć.
Apoŭdni ad Ijerusalimskaj patryjarchii pačynajecca Chrosny chod da Truny Haspodniaj. U chramie znachodzicca łampadka, kudy syjdzie Žyvatvorny ahoń, i 33 śviečki, jakija simvalizujuć 33 hady ziamnoha žyćcia Isusa Chrysta.
Paśla hetaha ŭ kaplicu ŭvachodzić Ijerusalimski patryjarch. Jon zdymaje svaju vopratku i zastajecca ŭ pałatnianym padraśniku, kab było vidać, što ŭ jaho niama nijakaha prystasavańnia dla zapalvańnia ahniu. Uvachod u Kuvukliju znoŭ apiačatvajecca, i ludzi molacca ŭ čakańni sychodžańnia ahniu.
Vierniki ličać, što kali ahoń nie sydzie, to heta budzie aznačać pačatak apošnich časoŭ — kanca śvietu.
Krytyki asudžajuć «źjaŭleńnie Žyvatvornaha ahniu» jak falsifikacyju. Na ich dumku, krynicu ahniu prosta chavajuć u Kuvuklii.
