Zatrymany pry kancy krasavika Andrej Uciuryn najdaŭžej z usich byŭ kiraŭnikom Słužby biaśpieki prezidenta (SBP). Jon uznačalvaŭ hetaje viedamstva ad 2007 da 2014 hady. Ahułam za 25 hadoŭ kiravańnia Alaksandra Łukašenki hetuju słužbu ŭznačalvała ŭžo 11 čałaviek. Pahladzim, jak skłaŭsia los hetych ludziej.

Viačasłaŭ Karaloŭ (1994—1995): pamior

Pra hetaha čałavieka ŭžo mała chto pamiataje. Jon pieršym uznačaliŭ strukturu SBP. Pa dadzienych partała tut.by, u chutkim časie paśla zvalnieńnia Karaloŭ pamior.

Juryj Barodzič (1995—1998): chakiej i handboł

Juryj Barodzič. Fota specnaz.ru.

Juryj Barodzič. Fota specnaz.ru.

Barodziču na siońnia 62 hady, jon rodam z Homiela. Vučyŭsia tam ža u Instytucie inžynieraŭ čyhunačnaha transparta. Naprykancy SSSR skončyŭ Vyšejšuju škołu KDB. A ŭ 2004 — Akademiju dziaržaŭnaj słužby pry prezidencie Rasii. Ad 1982 — na słužbie ŭ savieckim KHB, paśla — u biełaruskim KDB.

U pieršyja hady niezaležnaści Barodzič uznačalvaŭ śpiecnaz KDB, hrupu «Alfa». Mienavita adtul jaho zaprasili na słužbu da Łukašenki.

Były deputat Apazicyi BNF u Viarchoŭnym Saviecie Siarhiej Navumčyk zhadvaje, što ŭ asobie Barodziča jon paznaŭ čałavieka, jaki kamandvaŭ źbićciom deputataŭ BNF u Avalnaj zale padčas ich haładoŭki pratestu ŭ budynku parłamienta. «Heta jon pryjšoŭ i skazaŭ: «Ja daju vam try chviliny». Kali my admovilisia, to ŭvarvalisia ludzi ŭ čornym i śpiecnaz», — raskazvaje Navumčyk.

Jak skłaŭsia jahony los potym? U 1997 hodzie jon uznačaliŭ Biełaruskuju fiederacyju chakieju. U 1998 staŭ pradstaŭnikom KDB Biełarusi pry FSB Rasii. U 2004 hodzie viernuty z Maskvy, kab uznačalić BFSA «Dynama».

Paśla nie duža ŭpeŭnienych vystupaŭ chakiejnaha «Dynama» ŭ Kantynientalnaj chakiejnaj lizie Barodzič u 2013 byŭ adpraŭleny ŭ adstaŭku. Jaho źmianiŭ były kiraŭnik MNS Envier Baryjeŭ. Barodzič jašče zaśviaciŭsia ŭ jakaści namieśnika Uładzimira Kanaplova ŭ Biełaruskaj fiederacyi handboła.

Uładzimir Navumaŭ (1999—2000): MUS i Rasija

Cikava, što nastupnikam Barodziča ŭ SBP staŭ kiraŭnik užo hrupy «Ałmaz» (śpiecnaz MUS) Uładzimir Navumaŭ. Hety siłavik rodam sa Smalenska, ale havaryŭ ź biełaruskim akcentam. Amal usio žyćcio adpracavaŭ u orhanach MUS.

Z nabyćciom Biełaruśsiu niezaležnaści ŭznačalvaŭ atrad śpiecnaza MUS, paśla heta pierajšoŭ na pracu ŭ «Alfu».

Paśla pracy ŭ SBP Uładzimir Navumaŭ až praciahu dzieviaci hadoŭ uznačalvaŭ Ministerstva ŭnutranych spravaŭ. Pry im adbyvaŭsia razhon Płoščy 2006 hoda. Navumaŭ — adzin z čatyroch siłavikoŭ suprać jakich pa siońnia dziejničajuć sankcyi Jeŭrasajuza. Reč u tym, što jeŭrapiejcy padazravali Navumava ŭ datyčnaści źniknieńnia Viktara Hančara i Anatola Krasoŭskaha.

U adstaŭku Łukašenka adpraviŭ Navumava ŭ 2009 hodzie. Novaj pasady eks-ministru ŭ Biełarusi nie znajšłosia. Chacia niejki čas jon jašče ŭznačalvaŭ Biełaruskuju fiederacyju chakieja. Paśla hetaha Navumaŭ źjechaŭ u Maskvu. Niejki čas pracavaŭ tam u kancernie «Rastechnałohii», jakaja zajmajecca vyrabam vysokatechnałahičnaj zbroi. U 2014 atrymaŭ orden Ajčyny III stupieni za praviadzieńnie čempijanatu śvietu pa chakiei. U Minsku, kažuć, amal nie źjaŭlajecca.

Leanid Jeryn (2000): KDB i Rasijskaja čyhunka

Uradženiec Oršy Leanid Jeryn uznačalvaŭ Słužbu biaśpieki ŭsiaho paru miesiacaŭ. Jak i Barodzič, Jeryn vučyŭsia ŭ Instytucie inžynieraŭ čyhunačnaha transpartu ŭ Homieli. Papracavaŭ u łakamatyŭnym depo ŭ Śviardłoŭsku. Paśla hetaha pryjšoŭ na słužbu ŭ saviecki KHB. Braŭ udzieł u bajavych dziejańniach u Afhanistanie. U 1989 pieraviedzieny ŭ centralny aparat KDB SSSR u Maskvie, papracavaŭ i ŭ FSB Rasii.

U 1995 hodzie Łukašenka pryznačaje Jeryna pieršym namieśnikam kiraŭnika biełaruskaha KDB. pryznačeńnie rasijskaha śpiecsłužbista kiraŭnikom biełaruskaha KDB było znakavym jak dla siłavych struktur, tak i dla hramadstva. Tak i byŭ Jeryn na hetaj pasadzie da vieraśnia 2000, kali jaho zabrali ŭ SBP. U listapadzie Łukašenka adstaviŭ tahačasnaha staršyniu KDB Uładzimira Mackieviča i pryznačyŭ na jaho miesca Jeryna.

Padčas referendumu 2004 i nastupnych paśla jaho pratestaŭ Jeryn zaprasiŭ u svoj kabiniet arhanizatara akcyi Paŭła Sieviarynca. U chutkim časie Łukašenka adpraviŭ Jeryna ŭ adstaŭku.

U vyniku Jeryn, jak i Navumaŭ, pierajechaŭ u Maskvu i zaniaŭ miesca daradcy prezidenta «Rasijskaj čyhunki».

Hienadź Niavyhłas (2000—2001): Rada biaśpieki i futboł

Hienadź Niavyhłas. Fota by.tribuna.com.

Hienadź Niavyhłas. Fota by.tribuna.com.

Los Niavyhłasa taksama niejkim čynam byŭ źviazany z čyhunkaj. Jon naradziŭsia na stancyi Parachonsk Pinskaha rajona, dzie baćka pracavaŭ bryhadziram čyhunačnych šlachoŭ, maci — nastaŭnicaj biełaruskaj movy.

Vučyŭsia ŭ Vyšejšaj škole KHB u Maskvie. Paśla hetaha zajmaŭ roznyja pasady ŭ Pahraničnych vojskach. Sprava ŭ tym, što ŭ saviecki čas pahraničniki byli častkaj KHB. U SBP pryjšoŭ z pasady namieśnika staršyni Pamiežnaha kamiteta.

Paśla hetaha karjera Niavyhłasa imkliva pajšła ŭhoru. U 2001 hodzie zaniaŭ pasadu dziaržaŭnaha sakratara Rady biaśpieki — adnu z klučavych u krainie. Uznačalvaŭ pieradvybarčy štab Łukašenki na vybarach 2006 hoda. Paśla čaho atrymaŭ pryznačeńnie kiraŭnikom Administracyi prezidenta.

Paśla adstaŭki jon doŭhi čas uznačalvaŭ Biełaruskuju fiederacyju futboła. Zbornaja pry im, praŭda, pośpiechaŭ nie dasiahnuła. Paśla adstaŭki, u adroźnieńnie ad Jeryna, Navumava, jon zastaŭsia žyć u Minsku. Chacia jaho ŭnuki i źjechali ŭ Maskvu.

Jaŭhien Dźviarnicki (2001—2003): Parłamiencki schod Biełarusi i Rasii

Intervju Jaŭhiena Dźviarnickaha haziecie «Narodnaja vola».

Intervju Jaŭhiena Dźviarnickaha haziecie «Narodnaja vola».

Adzin z tych kiraŭnikoŭ Słužby biaśpieki, jakija paśla hetaj pasady nie pajšli na pavyšeńnie. Dźviarnicki rodam sa Škłova. Mahčyma, tam jany i paźniomilisia z Łukašenka. Sprava ŭ tym, što ŭ saviecki čas Dźviarnicki ŭznačalvaŭ škłoŭskuju rajonnuju milicyju.

Ad 1996 hoda — u Minsku. Pracavaŭ namieśnikam staršyni Hałoŭnaj dziaržaŭnaj padatkovaj inśpiekcyi, staršynioj Dziaržkamiteta finansavych rasśledavańniaŭ. Paśla pracy ŭ SBP hod pabyŭ namieśnikam ministra ŭnutranych spravaŭ Navumava.

Paśla hetaha Dźviarnickamu znajšli cichuju pasadu načalnika aparata pradstaŭnictva parłamienckaha schodu Biełarusi i Rasii ŭ Respublicy Biełaruś. 

Juryj Žadobin (2003—2007): Minabarony i KDB

Juryj Žadobin. Fota Siarhieja Hudzilina.

Juryj Žadobin. Fota Siarhieja Hudzilina.

Apošni kiraŭnik Słužby biaśpieki z pakaleńnia samoha Łukašenki. Sami jany adnahodki. Žadobin naradziŭsia va ŭkrainskim Dnieprapiatroŭsku. U adroźnieńnie ad papiarednikaŭ, jon vyjšaŭ nie sa struktury KDB ci MUS, a vojska.

Vojsku i addaŭ bolšuju častku svajho žyćcia. Praŭda, u SBP jon pryjšoŭ u ranzie kamandujučaha ŭnutranymi vojskami MUS. U lipieni 2007 hoda Žadobin uznačaliŭ KDB, ale mnohija kazali, što na hetaj pasadzie jon adčuvaŭ siabie niaŭtulna. Zapomniŭsia vykazvańniem, što ŭsie biełaruskija apazicyjaniery znachodziacca na ŭliku i ich 1767 čałaviek.

Ad 2009 da 2014 byŭ ministram abarony. Paśla čaho jaho źmianiŭ Raŭkoŭ. Na piensii, žyvie ŭ Minsku.

Andrej Uciuryn (2007—2014): Rada biaśpieki i turma

Andrej Uciuryn. Fota BiełTA.

Andrej Uciuryn. Fota BiełTA.

Ad Uciuryna pačynajecca novaja epocha. Pa-pieršaje, hety kiraŭnik značna maładziejšy za svaich papiarednikaŭ. Pa-druhoje, jaho nie zaprašali ź niejkaj inšaj siłavoj struktury, a jon źjaŭlajecca vychadcam z SBP.

Uciuryn naradziŭsia ŭ Pienzie Rasija. Jahony baćka byŭ kiraŭnikom uručanskaha śpiecnaza. Uciuryn niadoŭha papracavaŭ u orhanach milicyi. A ad 1995 — u Słužbie biaśpieki prezidenta, u jakoj dasłužyŭsia da načalnika.

U 2014 Uciuryna pieraviali namieśnikam dziaržsakratara Rady biaśpieki. Tam jon byŭ adkazny za pracu ź milicyjaj, ščylna kantaktavaŭ ź ministram Iharam Šunievičam i kamandujučym unutranymi vojskami Juryjem Karajevym.

U kancy krasavika 2019 hoda Uciuryna zatrymali supracoŭniki KDB. Pakul nieviadoma, što jamu inkryminujuć. Aryštavanaja ŭsia majomaść siłavika.

Viktar Šynkievič (2014—2016): źnik z radaraŭ

Uradženiec Dokšyckaha rajona. Vučyŭsia ŭ škole KDB, pracavaŭ u orhanach dziaržbiaśpieki. Ad 1995 — u SBP. Da pryznačeńnia — byŭ namieśnikam načalnika. Amatar palavańnia. Paśla adstaŭki pra Šynkieviča nie było zhadak u publičnaj prastory.

Andrej Paŭlučenka (2016—2017): AAC

Andrej Paŭlučenka. Fota sb.by.

Andrej Paŭlučenka. Fota sb.by.

Bijahrafii Paŭlučenki niama ŭ adkrytym dostupie. Ale toje samaje tyčycca i jahonaha papiarednika ŭ AAC Siarhieja Špiehuna. Paŭlučenka pabyŭ kiraŭnikom SBP mienš za hod. Paśla hetaha jaho adpravili kiravać Apieratyŭna-analityčnym centram — adnoj z samych zakrytych śpiecsłužbaŭ krainy.

Dźmitryj Šachrajeŭ (ad 2017 — da siońnia): ciapierašni kiraŭnik

Jašče adzin kiraŭnik, pra jakoha ničoha nie viadoma. Lidar pradprymalnickaj arhanizacyi «Pierśpiektyva» Anatol Šumčanka zhadvaŭ, što vučyŭsia razam z Šachrajevym u PTV №222 handlu na pradaŭca charčovych tavaraŭ. Šachrajevu 43 hady, jon minčuk. U SBP ad 90-ch hadoŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?