Pajezdka ŭ paŭtara kiłamietry na taksi abyšłasia pasažyrcy amal u 30 rubloŭ. Ale pakul jana tłumačyła kiroŭcu, što takuju ​​sumu płacić nie žadaje, ček pavialičyŭsia da 73 rubloŭ. Uvieś hety čas taksist nie vypuskaŭ žančynu z mašyny, tak što joj daviałosia vyklikać milicyju, piša Tut.by

Natalla z Łuninca pryjechała na aŭtobusie ŭ Minsk — siabry zaprasili ŭ hości. Znajomyja žančyny žyvuć u stalicy ŭ samym pačatku vulicy Majakoŭskaha — ad aŭtavakzała heta ŭsiaho paŭtara kiłamietra.

— Ja nie pieršy raz tak pryjechała, uvieś čas ad vakzała brała taksi — košt pajezdki byŭ nie vyšej za piać rubloŭ, na Uber i zusim try rubli, — raspaviała auto.tut.by žančyna. Pa zvyčcy jana padyšła da adnaho ź ich, nazvała adras i spytała, ci daviazuć jaje za 5 rubloŭ.

— Jon mnie skazaŭ: siadajcie. Pakul jechali, ja siadzieła ŭ telefonie. A praz paru chvilin kiroŭca ašałamiŭ: skazaŭ, što za pajezdku ja vinnaja 29 rubloŭ!

U pasažyrki pry sabie było tolki 10 rubloŭ najaŭnymi, ich jana i prapanavała kiroŭcu, adnak takuju ​​sumu jon prymać nie zachacieŭ.

— Ja pakinuła kupiuru ŭ sałonie i pasprabavała vyjści z aŭto, ale nie zmahła: ručki ŭ dźviarach byli abłamanyja.

U hety ž čas kiroŭca kranuŭsia ź miesca, papiaredziŭšy, što žančynu jon nie vypuścić, pakul jana nie raźličycca za pajezdku.

— Jon pahražaŭ, što nie budzie vyklučać taksomietr i kali ja nie zapłaču, to mnie nakapaje suma ŭ try razy bolšaja.

Natalla kaža, što spałochałasia, pačała płakać, ale pry hetym usio ž taki telefanavała ŭ milicyju i svaim siabram. Paśla hetaha kiroŭca spyniŭ aŭto i vypuściŭ Natallu, ale taksomietr nie vyklučyŭ.

— Vybieh z doma moj znajomy Dźmitryj, potym pryjechali milicyjanty, jany paprasili vadziciela vyklučyć taksomietr. Taksist vydaŭ mnie ček, zhodna ź jakim ja pavinna zapłacić užo 73 rubli 45 kapiejek.

Žančyna kaža, što ŭ pryncypie mahła b apłacić takuju ​​sumu za pajezdku, kali b jana sapraŭdy stolki kaštavała, ale pryncypova admaŭlałasia heta rabić.

— Ja navat nie dumała, što pajezdka na taksi ad borta moža stolki kaštavać, kiroŭcy jakija chočuć ceny, takija i ŭstaloŭvajuć, — aburanaja Natalla. — U nas napieradzie Jeŭrapiejskija hulni, u Minsk pryjeduć hości z roznych krain, a ich na vakzałach i aeraporcie buduć sustrakać voś takija taksisty, na jakoha narvałasia ja. Jakoje ž uražańnie składziecca ŭ ich pra našu krainu paśla takoha abdzirańnia?

Kiroŭca taksi Vadzim, taryfami jakoha zastałasia niezadavolenaja Natalla, u padrabiaznaściach kamientavać zdareńnie nie staŭ. Skazaŭ, što hetaja situacyja vielmi sapsavała jamu nastroj i adniała šmat času.

— Pasažyrka nie mieła racyi, joj heta navat milicyjanty patłumačyli. A taryfy vysokija, bo ja nie pracuju pa vykliku, a ad borta, jany ŭ mianie prapisany i visiać, ja ich nie chavaju. Ciapier hetaje pytańnie budzie vyrašać sud, ale ja ŭpeŭnieny — pasažyrka jaho prajhraje, — skazaŭ taksist.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?