Pieršapačatkova pomnik źbiralisia pastavić da dnia naradžeńnia Alaksandra 15 krasavika, adnak zrabić heta atrymałasia tolki niezadoŭha da Radaŭnicy, piša Radyjo Svaboda.

«Pastavili pomnik, zastałosia jašče krychu dobraŭparadkavać tam, plitku pakłaści, ale pomnik užo staić, — raskazała Śviatłana Koržyč. — Chadzili ŭčora z vajenkomam na mohiłki, hladzieli, što jašče treba zrabić. U vajenkamacie kažuć, što hrošaj bolš niama ŭ ich. Kali tak, to ja sama darablu. Dziakuj i na hetym».

Śviatłana nie viedaje, kolki dakładna hrošaj Minabarony pieraličyła na pomnik. Žančyna kaža, što padobny pomnik u Pinsku moža kaštavać kala 10 tysiač rubloŭ. Raniej na mahile Alaksandra stajaŭ draŭlany kryž, pastaŭleny padčas pachavańnia. Pastavić pomnik na mahile jaje syna paabiacaŭ asabista ministr abarony Andrej Raŭkoŭ. Heta adbyłosia padčas asabistaha pryjomu ŭ ministerstvie.

«Mnie padabajecca, dobry pomnik, — dadaje Śviatłana Koržyč. — Adzinaje, što paśla śviatary admaŭlalisia aśviacić jaho. My pajšli prasić razam ź siastroj Sašy. Spačatku adzin nie zachacieŭ, potym jašče adzin. Dy jašče nam u ruki ŭsunuŭ kartku z malitvaj za suicydnikaŭ. Vielmi kryŭdna było… U vyniku znajšoŭsia jašče adzin śviatar, małady. Jon aśviaciŭ».

Alaksandr Koržyč trahična zahinuŭ na terytoryi Abjadnanaha navučalnaha centra ŭ barysaŭskich Piečach u kancy vieraśnia 2017 hoda. Jaho cieła było znojdzienaje paviešanym u padvale miedycynskaj roty tolki praz tydzień paśla zdareńnia. Pieršapačatkova Minabarony nazvała vypadak šarahovym suicydam, adnak paśla rozhałasu ŭ ŚMI ŭ Piečach adbylisia masavyja zatrymańni siaržantaŭ i aficeraŭ, a kiraŭnik navučalnaha centru straciŭ pasadu.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?