Z prośbaj razhledzieć prajekt budaŭnictva transhraničnaha vodapravoda z Ałtajskaha kraju Rasii ŭ Kitaj u kancy krasavika źviarnuŭsia va ŭrad rasijski deputat Alaksiej Čepa. Aparat urada 8 maja dasłaŭ zvarot deputata na prapracoŭku ŭ šerah rasijskich ministerstvaŭ i viedamstvaŭ, piša RBK.
Prajekt budaŭnictva vodapravoda, jaki abmiarkoŭvali deputaty, prapanavała kitajskaje Tavarystva abmienaŭ i supracoŭnictva pamiž Rasijaj, Uschodniaj Jeŭropaj, Centralnaj Azijaj i KNR. U listapadzie minułaha hoda staršynia tavarystva He Čžyli navat napisaŭ list rasijskamu premjeru Dźmitryju Miadźviedzievu z prośbaj padtrymać prajekt.
Kitajcy prapanoŭvali rasijskim uładam pabudavać mahistralny vadavod Rasija — Kazachstan — Zachodni Kitaj ahulnaj praciahłaściu 1,2-1,5 tys. km. Pavodle zadumy aŭtaraŭ prajekta na pieršym etapie, da 2026 hoda, treba budzie pabudavać pieršuju čarhu mahistralnaha trubapravoda mahutnaściu 600-700 młn kub. m u hod i sietki raźmierkavalnych trubapravodaŭ. Na druhim etapie, da 2040 hoda, prapanujecca pabudavać druhuju čarhu vadavoda, što pavialičyć jaho mahutnaść da 1,8-2,4 młrd kub. m u hod, i realizavać ahratechničnyja i inšyja prajekty, jakija pavyšajuć efiektyŭnaść vodakarystańnia.
Abjom inviestycyj va ŭvieś prajekt, pavodle acenak ekśpiertaŭ, moža skłaści da $88 młrd.
Nieabchodnaść budaŭnictva vodapravoda kitajcy tłumačyli tym, što ŭ Kitai šerah rehijonaŭ adčuvajuć značny deficyt vady. U padrychtavanym daśledavańni ab prablemie «vodnaha hoładu» adznačajecca, što na poŭnačy Kitaja deficyt presnaj vady składaje kala 70 młrd kub. m. Asabliva vostraja situacyja va Ujhuryi — tam deficyt nie mienšy za 12-15 młrd kub. m vady ŭ hod. Dla Kazachstana deficyt vady — pakul što nie takaja vostraja prablema, ale tam jon taksama pastupova raście i da 2040 hoda moža dasiahnuć 12 młrd kub. m.
Ałtajski kraj ža, naadvarot, pakutuje ad viasnovych pavodak, z-za jakich u rehijonie ŭtvorycca lišak vady — 75-100 młn kub. m..
