Ukrainski palityk Viktar Miedźviadčuk zajaviŭ, što vychodzić ź pieramoŭnaha pracesu z Rasijaj. Pra heta Miedźviadčuk zajaviŭ u intervju rasijskamu vydańniu VZHLAD.
«Na vialiki žal, ja nie baču sensu pradstaŭlać intaresy kamandy Zialenskaha jak novaj ułady nie tolki tamu, što naša partyja znachodzicca da jaho ŭ apazicyi z momantu jaho abrańnia… Ja nie mahu pradstaŭlać intaresy novaj ułady ŭ pieramovach z Rasijaj z ulikam pazicyi spadara Zialenskaha pa pryncypovych dla mianie pytańniach», — skazaŭ Miedźviadčuk.
Pa słovach Miedźviadčuka, jon vystupaje za mir na Danbasie, za viartańnie ludziej, jakija žyvuć na niepadkantrolnych terytoryjach i «za viartańnie Danbasa na Ukrainu, a Ukrainy ŭ Danbas».
«Pazicyja spadara Zialenskaha, jakuju jon sfarmulavaŭ, całkam supiarečyć majmu mirnamu płanu, jaki praduhledžvaje aŭtanomiju dla hetych terytoryj», — padkreśliŭ Viktar Miedźviadčuk.
Miedźviadčuk paskardziŭsia, što Zialenski vystupaje suprać asablivaha statusu dla Danbasa, suprać amnistyi «dla hramadzian Ukrainy, jakija žyvuć na niepadkantrolnych terytoryjach».
Viktar Miedźviadčuk źjaŭlajecca kumam rasijskaha prezidenta Uładzimira Pucina. Choć na pieramovach jon aficyjna pradstaŭlaŭ ukrainski bok, va Ukrainie Miedźviadčuka padazrajuć u ciesnych suviaziach z Kramlom i ŭ tym, što jon źjaŭlajecca pravadnikom rasijskaj palityki va Ukrainie.
