Nieŭzabavie paśla vychadu finalnaj sieryi našumiełaha mini-sieryjała «Čarnobyl», jaki raspaviadaje pra trahičnyja padziei na Čarnobylskaj AES u krasaviku 1986 hoda, novy chit HBO stanie dastupny na biełaruskaj movie: videaservis VOKA sumiesna z Amiedyja TB (brend AMEDIATEKA Home of HBO) prystupiŭ da pracy nad stvareńniem jaho biełaruskaj ahučki.
Čytajcie taksama: Sieryjał «Čarnobyl»: amierykancy stvaryli vobraz biełaruski, jakaja pavinna praduchilić źniščeńnie kantynienta
Mini-sieryjał «Čarnobyl» — heta chronika adnoj z samych strašnych technahiennych katastrof u suśvietnaj historyi, jakaja ŭražvaje svajoj realistyčnaściu i dramatyzmam. Samyja ciažkija nastupstvy vybuchu pryniała na siabie mienavita terytoryja Biełarusi. Hetaja akaličnaść prymušaje biełaruskich hledačoŭ stavicca da sieryjała z asablivaj uvahaj: bo ŭsio, što adbyvajecca ŭ kadry — častka ich ahulnaj historyi i ahulnaj trahiedyi. Niepasrednaja ŭzajemasuviaź padziej mini-sieryjała i adnoj z samych dramatyčnych staronak biełaruskaj historyi i stała hałoŭnaj pryčynaj dla taho, kab dać hledačam VOKA mahčymaść hladzieć jaho na biełaruskaj movie.
Mini-sieryjał «Čarnobyl» uznaŭlaje padziei adrazu paśla avaryi na Čarnobylskaj AES, raspaviadajučy pra achviaraŭ, pryniesienych dziela likvidacyi jaje nastupstvaŭ i praduchileńnia jašče bolšaj biady. Scenar dla prajekta napisaŭ Krejh Mazin («Biełaśniežka i Palaŭničy 2»). Kab uznavić karcinu padziej maksimalna abjektyŭna i blizka da realnaści, jon abapiraŭsia na archiŭnyja krynicy, śviedčańni vidavočcaŭ i inšyja histaryčnyja dakumienty. A asnoŭnyja zdymki prachodzili ŭ łakacyjach, blizkich da Čarnobyla i terytaryjalna, i histaryčna: u Litvie i Kijevie. Pry hetym vialikaja častka naturnych zdymak enierhabłokaŭ Čarnobylskaj AES adbyvałasia na Ihnalinskaj AES, pabudavanaj pa padobnym prajekcie.
Brytanski akcior Džared Charys («Mad Men», «Karona») vykanaŭ rolu Valeryja Lahasava, člena ŭradavaj kamisii pa rasśledavańni pryčynaŭ i pa likvidacyi nastupstvaŭ avaryi. Stełan Skarshard («Dziaŭčyna z tatuiroŭkaj drakona», «Miełancholija») syhraŭ namieśnik kiraŭnika savieta ministraŭ SSSR Barysa Ščarbinu, kiraŭnika hetaj kamisii. Naminantka na «Oskar» Emili Uotsan («Raśsiakajučy chvali») uvasobiła vobraz vydumanaha vučonaha-fizika Uljany Chamiuk, jakaja imkniecca raskryć sapraŭdnuju pryčynu avaryi. Pastaviŭ sieryjał šviedski režysior Jochan Ren (viadomy pa pracy nad chitami «Va ŭsie ciažkija» i «Vikinhi»).
Zaraz videaservis VOKA prystupiŭ da padrychtoŭki pierakładu i ahučki mini-sieryjała na biełaruskuju movu. Sieryjał u zvykłaj viersii ŭžo ciapier možna pahladzieć u raździele AMEDIATEKA. U raździele «CINEVOKA — kino pa-biełarusku» «Čarnobyl» źjavicca ŭ pačatku lipienia.
