U asnovu scenaryja mini-sieryjała Čarnobyl lehła kniha łaŭreatki Nobieleŭskaj premii pa litaratury Śviatłany Aleksijevič Čarnobylskaja malitva. Chronika budučyni. U efiry ŭkrainskaj radyjostancyi «Radio NV» Aleksijevič padzialiłasia ŭražańniami ad našumiełaha sieryjała.
Nobieleŭskaja łaŭreatka adznačyła pośpiech sieryjała Čarnobyl: «Niahledziačy na dastatkovuju kolkaść filmaŭ pra Čarnobyl, mabyć, niaŭdałych — u ich čahości nie chapała, i ŭsie jany prachodzili mima. Jak i knihi, niahledziačy na miljonnyja tyražy, što dakazvaje, što ŭsio ž taki śviet naležyć telebačańniu».
Jana dadała, što asabista joj sieryjał padabajecca, bo jaho aktyŭna abmiarkoŭvaje moładź, adkryvajučy dla siabie Čarnobylskuju trahiedyju.
Aleksijevič taksama ličyć, što, mahčyma, pośpiech filma abumoŭleny jašče i tym, što jaho vychad pryjšoŭsia ŭ pieryjad farmiravańnia ekałahičnaj śviadomaści čałaviectva. «My bačym, jak pryroda spluščvajecca, niezadavolenaja nami, kolki ŭ čałaviectva prablem płanietarnaha maštabu, hieałahičnaha. Ja dumaju, heta dobra, što my zadumvajemsia i jak maha bolš ludziej budzie pra heta kazać», — skazała jana.
Aleksijevič raspaviała, što telekanał HBO aficyjna źviarnuŭsia da jaje z prośbaj vykarystoŭvać niekalki historyj z knihi ŭ sieryjale.
«My padpisali kantrakt. Ja spačatku sumniavałasia, pakolki maju knihu ŭžo dziasiatak razoŭ brali ŭ asnovu filmaŭ, i ja dumała, što heta budzie čarhovaja niaŭdača, a akazałasia zusim naadvarot — atrymaŭsia niejki vybuch!» — padzialiłasia Śviatłana Aleksijevič.
Adnak jana adznačyła, što nie vielmi zrazumieła pavodziny kanała HBO: «Mnie niezrazumieła, čamu, vykarystaŭšy dla sieryjała maje teksty, teksty Uładzimira Hubarava, jaki pisaŭ pra Valera Lahasava, jany čamuści nidzie nie napisali našych proźviščaŭ. Styl taki amierykanski mnie nie vielmi zrazumieły».
Aleksijevič adznačyła, što aŭtary filma dosyć dakładna pakazali nie tolki historyi ź jaje knihi, ale taksama dumki, adčuvańni i fiłasofiju knihi.
Viadučy spytaŭ u Aleksijevič, čamu biełarusy, ukraincy i ruskija byli niazdolnyja źniać takoje kino. Nobieleŭskaja łaŭreatka adznačyła vysoki prafiesijanalizm Halivuda. Taksama jana źviarnuła ŭvahu na toje, što hety film — pohlad z boku, pohlad svabodnych ludziej, svabodnych ad našych zababonaŭ, što taksama było pazityŭnym faktaram dla filma.