Adkryćcio doški Česłava Niemena na budynku Humanitarnaha kaledža było prymierkavana da pryjezdu ŭ Hrodna 6 červienia maršałka polskaha Sienata Stanisłava Karčeŭskaha i staršyni Savieta Respubliki Michaiła Miaśnikoviča, piša Hrodna.life.
Inicyjatarami ŭstanoŭki pamiatnaj doški na budynku navučalnaj ustanovy, dzie vučyŭsia z 1954 pa 1955 hh. Česłaŭ Niemen, vystupili Hienieralnaje konsulstva Polščy ŭ Hrodnie i miascovy harvykankam. Rabiŭ došku hrodzienski skulptar Uładzimir Pancialejeŭ. Na došcy akramia nadpisaŭ na biełaruskaj i polskaj movach, raźmieščany bronzavy bareljef z vyjavaj tvaru śpievaka.
Na adkryćcio doški pryjechała i druhaja žonka muzyki Małhažata Niemen.
«Česłaŭ akurat viarnuŭsia ŭ Hrodna ŭ svajo 80-hodździe. Raduje, što praz stolki času vialikaja kolkaść maładych biełarusaŭ budzie pamiatać i vyvučać jaho tvorčaść. Česłaŭ dzieści lacić na vobłaku abo na samalocie (red. pralataŭ u toj momant) i machaŭ nam na adkryćci. Viadoma, było b lepš, kali b takuju tablicu paviesili značna raniej, dzie-niebudź u hadach 1970-ch. Ale i tak dobra, što praz stolki času, pamiatajuć u navučalnaj ustanovie, što jon tut vučyŭsia», — raspaviała Małhažata.
Vybitny polski muzyka, kampazitar i śpiavak Česłaŭ Niemen (Česłaŭ Vydrycki) naradziŭsia ŭ 1939 hodzie ŭ Hrodzienskaj vobłaści, u vioscy Vasiliški. U siaredzinie 1950-ch hh. budučy muzyka vučyŭsia ŭ Hrodnie ŭ piedahahičnym vučyliščy. A ŭ 1958-m siamja Vydryckich pierajechała ŭ Polšču. Tam Niemen i staŭ viadomaj asobaj na uvieś śviet.
