U pačatku hoda na kursy ŭkrainskaj movy zapisałasia kala 80 čałaviek. Meta, ź jakoj prychodzili słuchačy na kursy, u kožnaha svaja. Chtości prychodziŭ, kab padciahnuć uzrovień svajoj rodnaj movy, chtości płanuje pracavać va Ukrainie, dla niekatorych u pryjarytecie było vyvučyć movu, kab mieć mahčymaść na joj čytać.
Nastaŭnik Alaksiej Leanovič napałovu ŭkrainiec. Jaho mama rodam z Charkaŭščyny. Na kursy pryjšoŭ udaskanalić movu, jakuju čuŭ u siamji ź dziacinstva.
Alaksiej Leanovič ličyć, što cikavaść da biełaruskaj movy była b bolšaj, kab knihi kaštavali nie tak doraha.
«Mnie vielmi cikavaja heta mova. Chaču, kab jana žyła nie tolki va Ukrainie, ale i za miažoj, tamu strajusia stvarać vakoł siabie ŭkrainskuju moŭnuju prastoru: hladžu ŭkrainskaje telebačańnie, čytaju knihi pa-ukrainsku.
Ja siabie złaviŭ na dumcy, što amal uvieś čas razmaŭlaju na ŭkrainskaj abo rasijskaj movie. Tamu vyrašyŭ na nastupny hod pačać naviedvać kursy biełaruskaj movy.
Viedajecie, ja razy čatyry na hod byvaju va Ukrainie i zaŭsiody pryvožu adtul knihi. Voś vam adkaz na pytańnie, jak papularyzavać biełaruskuju movu.
Treba zrabić knihi na biełaruskaj movie bolš tannymi. Naprykład, va Ukrainie niama padatku na dadanuju vartaść na knihi, jakija napisanyja pa-ŭkrainsku.
I knihi tam kaštujuć u razy dva tańniej, čym u Biełarusi. Tamu na ŭkrainskaj movie ja čytaju knihi i suśvietnych aŭtaraŭ».
«Sučasnaja ŭkrainskaja litaratura — heta biaskoncaja prastora dla ščaścia»
Taćciana Struk, kiraŭnica tavarystva ŭkraincaŭ «Obrij», jakaja dapamahała na kursach z vykładańniem ukrainskaj movy, pryjšła na vypuskny ŭ vyšyvancy, jakoj bolš za 100 hadoŭ.
«Mnie padaryła jaje babula majoj siabroŭki. Akramia hetaj, u maim harderobie jość jašče dziesiać staražytnych vyšyvanak. Ja našu ich tolki na ŭračystaści. Siońnia adno z samych vialikich śviataŭ ludziej, jakija zakachanyja ŭ movu», — raskazvaje spadarynia Taćciana.
Taćciana Struk ciaham hoda vykładała ŭkrainskuju movu i litaraturu. A biełarusam, jakija chočuć paznajomicca z ukrainskaj litaraturaj, raić pačać z tvoraŭ Lesi Ukrainki.
«Jana źviazanaja ź Biełaruśsiu, žyła tut na vulicy, jakaja ciapier nazyvajecca Kujbyšava, kali pryjechała dahladać svajho chvoraha siabra Siarhieja Miaržynskaha. Tut, u Minsku, jana napisała vydatnuju paemu «Apantanaja». Taksama raju pačytać Vasila Stusa, Siarhieja Žadana. Oj, što tam kazać! Sučasnaja ŭkrainskaja litaratura — heta biaskoncaja prastora dla ščaścia, miedytacyi, i zakachanaści va ŭkrainskuju movu», — padsumavała Taćciana Struk.
Pasoł Ukrainy: nie rekłamujem kursy, bo baimsia nie dać rady z kolkaściu achvotnych
Pasoł Ukrainy ŭ Biełarusi Ihar Kizim sustrakaŭ vypusknikoŭ asabista.
«Ja baču tut i ŭkraincaŭ, i biełarusaŭ. I vielmi ŭściešany takoj cikavaściu da našaj rodnaj movy! Kali ŭ 2018 hodzie my pačynali kursy, rabili heta tak: «Nu davajcie pasprabujem!» I ŭsim tak spadabałasia, što filijały kursaŭ sioleta adkrylisia ŭ Homieli i Breście. Na nastupny hod achopim usiu Biełaruś», — uśmichajecca Ihar Kizim.
«Mianie paprakali, što było mała rekłamy kursaŭ, ale ja aściarožny. Što ž my budziem rabić, kali na nastupny hod atrymajem 300, 500 zajavak? Zrazumiejcie, kursy całkam biaspłatnyja. Vykładčyki pracujuć na dobraachvotnych pačatak. Tamu siońnia ja abaviazkova padziakuju nie tolki našym vypusknikam za cikaŭnaść da movy, ale i vykładčykam, za toje, što tak addana pracavali, i, kaniečnie ž, Tavarystvu biełaruskaj movy, jakoje padtrymała nas», — padsumavaŭ spadar pasoł.
