Hetymi dniami, 7-9 červienia, u hrodzienskim kinateatry «Kosmas» demanstrujuć film Džejmsa Kemierana «Terminatar 2. Sudny dzień» u prafiesijnaj ahučcy na biełaruskaj movie. Jak adbyvajucca pakazy 3D-viersii, zroblenaj da 25-hodździa znakamitaj stužki, piša Hrodna.life.
«Terminatar 2» — heta pieršy ŭ historyi Biełarusi film u 3D, jaki možna pahladzieć na biełaruskaj movie. U zapisu ŭdzielničali biełaruskija akciory i televiadoŭcy. Andrej Miluchin ahučyŭ niaŭrymślivaha T-1000 (piersanaž Robierta Patryka), Pavieł Charłančuk — humannaha T800 (Arnold Švarcenehier), Śviatłana Cimochina ahučyła Saru Konar (Linda Chemiłtan).
Na hrodzienskich pakazach, jakija doŭžacca ŭsiaho try dni, na ŭvachodzie hledačam razdavali infabuklety pra film, a vałanciory pierad sieansam apytvali, jakija jašče filmy jany chacieli by pahladzieć pa-biełarusku ŭ Hrodnie.
Kino pa-biełarusku na vialikim ekranie — adnosna novaja źjava dla Biełarusi i asabliva dla Hrodna. Pakazy prachodziać u miežach prajekta «Biełaruskija ŭikiendy» pra padtrymcy kampanii Velcom | A1. Minskaja kampanija «Kinakonh» zajmajecca prafiesijnym ahučvańniem i ładzić rehularnyja biełaruskamoŭnyja pakazy ŭ kinateatrach svajho horada ŭžo niekalki hod: usie kvitki na sieansy raskupajucca zahadzia. U Hrodnie heta ahułam čaćviorty pakaz, a sioleta tolki druhi.
«Pa žanrach my starajemsia pieramiažoŭvać. Papiaredni film byŭ dziciačy, «Chroniki Narnii», ciapier heta bajavik, a nastupnym, i ŭ Minsku, i ŭ Hrodnie, my płanujem pakazać liryčny film «Chacika» — raskazaŭ Andrej Kim, kiraŭnik «Kinakonha». Arhanizatary abiacajuć, što heta adbudziecca pryblizna praź miesiac, a paźniej jany płanujuć pryvieźci znakamity film pra miłaha miadźviedzia, «Padynhtan», mahčyma, navat dźvie častki.
Kaardynatarka hrodzienskich pakazaŭ ličyć, što biełarusy ŭ kožnym horadzie musiać mieć mahčymaść hladzieć kino na svajoj movie, i spadziajecca, što ź ciaham času heta stanie naturalnaj źjavaj, a nie nadzvyčajnaj padziejaj.
Hledačy pierad sieansam paćviardžali, što pryjšli pahladzieć ulubiony film dziacinstva ŭ kinateatry, mnohich zacikaviła mova pakazu.
«Na film prychodziać pieravažna ruskamoŭnyja hledačy, heta 90% našaj aŭdytoryi. Dla taho, kab lubić biełaruskuju movu, nieabaviazkova razmaŭlać pa-biełarusku», — tłumačyć Andrej Kim.
Vybar filma dla pakazu nievypadkovy. «Terminatar 2» — kłasika kino, film, jaki atrymaŭ čatyry «Oskary», źmianiŭ staŭleńnie tahačasnaha kiniematohrafa da ŭžyvańnia kampjutarnych efiektaŭ, a krytyki pryznajuć rolu Terminatara najlepšaj u karjery Arnolda Švarcenehiera.
«Heta lehiendarnaje kino. Mienavita «Terminatar 2″ maje kultavy status. Taksama jość peŭnaja aktualnaść taho, pra što jon kaža: vakoł nas mnoha vojnaŭ, hvałtu, i jość momant dehumanizacyi čałavieka. Hety film pra strach čałavieka, što daviadziecca adkazvać za svaje učynki», — ličyć Andrej Kim. — Film vielmi hłyboka raskryvaje momant dehumanizacyi Terminatara. «Terminatar» pierakładajecca jak «likvidatar», jon stvorany, kab zabivać ludziej. I zaraz u mnohich miedya pryniata dehumanizavać niekatorych ludziej, naprykład, kazać nie «zabili terarysta», a «likvidavali terarysta». Terminatar na praciahu filma vučycca canić žyćcio. U kancy jość kłasnaja fraza: «Kali hety robat-zabojca navučyŭsia canić čałaviečaje žyćcio, to moža i ŭ nas jość šaniec». Akramia taho, što sam pa sabie film kultavy, i my jaho daŭno chacieli ahučyć, mnie zdajecca, što jon aktualny i ciapier, nam varta bolš canić adzin adnoha».
