Padčas pajezdki ŭ Litvu staršynia partyi BNF Ryhor Kastusioŭ naviedaŭ hiej-parad u Vilni. Kaža, bajacca takich mierapryjemstvaŭ nie varta.

«Ja jeździŭ u Vilniu z 5 pa 8 červienia, litoŭcy zaprasili naviedać Ihnalinskuju AES, aznajomicca z prablemami. U hety ž čas prachodziŭ vialiki Bałtyjski hiej-prajd. Była mahčymaść pahladzieć na hetaje mierapryjemstva, i ja vyrašyŭ schadzić. Sam parad nie bačyŭ, pahladzieŭ tolki, jak farmiravałasia kałona, — kaža Ryhor Kastusioŭ. —

Čamu ja vyrašyŭ schadzić: apošnim časam u Biełarusi hetaja tema nabyvaje bolš mocnaje hučańnie. Łukašenka vykazvajecca, Šunievič… U mianie skłałasia ŭražańnie, što na hetuju temu ŭsie razmaŭlajuć. A nie pahladzieŭšy na svaje vočy, što ž heta takoje, składana sfarmiravać svoj asabisty padychod i kamientavać hetuju temu».

Akazałasia, što ŭsio nie tak strašna, kaža palityk.

«Mnie, jak biełaruskamu palityku, cikava było pahladzieć, što heta za mierapryjemstva, što heta za ludzi, jak jany vyhladajuć, što chočuć skazać hetym mierapryjemstvam. I pabyŭšy tam, ja pačaŭ lepš razumieć hetych ludziej. Majo staŭleńnie da ich stała mienš kateharyčnym, — kaža Kastusioŭ. — Ludziej było šmat, prychodzili i siemjami, i ź dzietkami. I hałoŭnaje, što z boku inšych hramadzian i turystaŭ nie było varožaha staŭleńnia da ludziej nietradycyjnaj aryjentacyi.

U Biełarusi, na žal, zusim inšy padychod. Kab takoje šeście było ŭ Biełarusi, to staŭleńnie i ŭładaŭ, i mnohich hramadzianaŭ było b inšym.

Ale my musim pryznać, što siarod nas ludziej ź nietradycyjnaj aryjentacyjaj vielmi šmat. Jany žyvuć siarod nas. I ŭłady, i palityki musiać zrabić tak, kab takija ludzi adčuvali siabie narmalna i kamfortna. Kab ich nie zabivali, kab na ich nie napadali.

Ja ciapier, pahladzieŭšy na mierapryjemstva, pabačyŭ, što ničoha strašnaha ŭ hetym niama. Ja, kaniečnie, bolš schilajusia da pazicyi, što nie varta vynosić na publiku pytańnie, z kim ty śpiš.

Ale mianie, jak biełaruskaha palityka, chvaluje nie tolki biaśpieka i niebiaśpieka hetych ludziej. My imkniomsia ŭ Jeŭrasajuz. I ŭvachod tudy ščylna źviazany z vyrašeńniem pytańnia ŁHBT i staŭleńnia da ich i ŭłady, i hramadstva. Hetuju temu raniej ci paźniej Biełarusi pryjdziecca ŭźniać».

Kastusioŭ pryznaje, što jon — čałaviek vielmi kansiervatyŭnych chryścijanskich pohladaŭ. Ale, kaža, pytańnie biaśpieki i kamfortu hramadzianina nie pavinna zaležać ad jaho aryjentacyi:

«Kali ministr unutranych spraŭ nazyvaje takich ludziej «dziravymi» — heta nienarmalna. Heta padšturchoŭvaje ŭsio hramadstva da niehatyvu, padlivaje bienzin u ahoń zamiest taho, kab toj niehatyŭ strymlivać».

Na dumku Kastusiova, hiej-parad u Minsku — prava hramadzian Biełarusi.

«Ułady pavinny paspryjać praviadzieńniu takoha mierapryjemstva, kali jano nie budzie parušać zakanadaŭstva. Bo heta prava hramadzian niezaležnaj dziaržavy», — padkreśliŭ Ryhor Kastusioŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?