10 červienia ministr unutranych spraŭ Ihar Šunievič pakinuŭ svaju pasadu. Jon zapeŭniŭ, nibyta sam padaŭ u adstaŭku.
Šunievič zajmaŭ post ministra až z 2012 hoda i za hety čas paśpieŭ zapomnicca jarkimi i časta nieadnaznačnymi vykazvańniami na mnohija temy.
Ministr i forma NKVD
Zvyčka śviatkavać 9 Maja ŭ formie NKVD vyklikała abureńnie značnaj kolkaści hramadstva. Šunievič ža kazaŭ, što hanarycca i formaj, i tymi, chto nasiŭ jaje ŭ svoj čas.
«Ja hanarusia tym, što ŭ mianie jość absalutna dakładnaja kopija hetaj formy. Jana pašytaja pa sapraŭdnych starych lekałach. Navat huziki adlityja na tym ža manietnym dvary, dzie ich rabili ŭ tyja hady. Bolš za toje, u mianie jość i poŭny kamplekt ekipiroŭki — pačynajučy ad aficerskaha płanšeta i zakančvajučy kompasam časoŭ vajny. Pry hetym ja nie zachaplajusia vajennaj rekanstrukcyjaj, formu dla siabie sšyŭ z unutranaha impulsu, za ŭłasny košt. I jakraz dziela taho, pra što ŭžo skazaŭ, — pakazać, što pamiać pra ludziej, jakija kaliści nasili heta abmundziravańnie, žyvaja i šanavanaja pa hety dzień», — kazaŭ Šunievič.
Ministr i adekvatnaść
Taksama zapomniŭsia adkaz ministra na pytańnie žurnalista pra čarhovy incydent sa skulpturaj haradavoha. U 2018 hodzie padletka, jaki daŭ poŭchu skulptury, milicyjanty prymusili vybačycca na kamieru.
Šunievič paśla zajaviŭ, što rolik z vybačeńniami byŭ jaho idejaj.
— A navošta? — udakładniŭ žurnalist.
— Tamu što, — adkazaŭ Šunievič.
— Vam nie zdajecca heta dziŭnym?
— Nie, kali b heta było dziŭnym, ja b hetaha nie rabiŭ, ja adekvatny čałaviek.
Ministr i «dziravyja»
Baraćba z ŁHBT — asobnaja staronka ŭ ministerstvie ŭnutranych spraŭ. Mienavita pry Šunieviču seks-mienšaści čamuści stali cikavić MUS. Ministerstva navat pačało vypuskać zajavy, pryśviečanyja «tradycyjnym kaštoŭnaściam» u dzień baraćby z hamafobijaj.
Nie maŭčaŭ i ministr.
«Isnuje peŭnaja katehoryja hramadzian, jakich ja, — prabačcie za słenh, heta moj termin, maja definicyja — nazyvaju «dziravyja». Niekatoryja ź ich zrabili sabie adtuliny ŭ tych miescach, jakija pryrodaj nie praduhledžanyja.
Niekatoryja hetyja adtuliny vykarystoŭvajuć nie pa pryznačeńni. A niekatoryja — sapraŭdy dzirka. U adukacyi, vychavańni, kultury, intelekcie.
Niekatoryja ŭsio heta kambinujuć. Zadača ŭ ich usich adna, heta ŭsim zrazumieła: blisnuć u ŚMI, u internecie, nabrać peŭnuju kolkaść sabačych vokličaŭ, jak ja ich nazyvaju, łajkaŭ. Naturalna, atrymać hranty ad svaich zakardonnych kurataraŭ. I zadavolić svajo chvaravitaje eha», — skazaŭ Šunievič u pieradačy «Ničoha asabistaha» na ANT.
Ministr i litaratura
Na Minskim knižnym kirmašy ŭ Šunieviča pacikavilisia jaho litaraturnymi hustami. Ministr adkazaŭ, što sučasnych aŭtaraŭ nie pryznaje. Ale lubić kłasiku — nastolki, što žonka čytaje jamu ŭhołas paemu Kołasa.
«Biełaruskuju litaraturu čytaju, kali jość takaja mahčymaść. Ja šmat razoŭ pieračytvaŭ «Pana Tadevuša» Adama Mickieviča. Siońnia šukaŭ hetuju knihu na anhlijskaj movie, ale nie znajšoŭ. Paprasiŭ ministra, kab vydali, bo cudoŭny padarunak zamiežnym haściam. Kali zusim času niama, to mnie ŭhołas «Novuju ziamlu» čytaje žonka», — raskazaŭ čynoŭnik.
Ministr i fryłansiery
Časam Šunievič demanstravaŭ navat peŭnaje pačućcio humaru.
«Kali ty fryłansier, budź hatovy sustreć na svaim šlachu frykopaŭ», — skazaŭ ministr u toj ža pieradačy «Ničoha asabistaha» na ANT.
Praŭda, praciah byŭ nie vielmi śmiešnym: Šunievič raspavioŭ, što žurnalisty-fryłansiery biez akredytacyj, na jaho dumku, žurnalistami nie źjaŭlajucca.
«Kali ty žurnalist, to, zhodna z zakonam, ty abaviazany siabie identyfikavać, mieć dakumient, jaki paćviardžaje asobu, mieć dakumient, jaki paćviardžaje tvaju prafiesijnuju akredytacyju, mieć admietnyja prykmiety — kamizelku, bejdž, infarmacyjnuju tabličku abo narukaŭnuju paviazku. Kali ty zamiežny žurnalist — mieć dakumient ab akredytacyi ŭ našaj krainie. Kali ty fryłansier, budź hatovy sustreć taho, chto taksama budzie volny ad peŭnych umoŭnaściaŭ dla taho, kab identyfikavać ciabie jak žurnalista. Ty takim nie źjaŭlaješsia».
Ministr i cyhany
Zusim niadaŭna adbyłasia hučnaja historyja sa śmierciu mahiloŭskaha inśpiektara DAI Patapoviča, jakoha znajšli miortvym u lesie. Spačatku ŭ zabojstvie — jakoje paźniej pryznali suicydam, — padazravali cyhanoŭ, tamu milicyjanty masava praviali zatrymańni ŭ cyhanskich rajonach Mahilova. Kazali pra sotniu zatrymanych, paźniej ich paadpuskali.
Kiraŭnik Administracyi prezidenta Natalla Kačanava paśla hetaj historyi naviedała Mahiloŭ, dzie sustrełasia z cyhanami i navat vybačyłasia.
Šunievič ža paviedamiŭ, što vybačacca nie bačyć pryčynaŭ.
«U ministra niama pryčyny prasić prabačeńnia u cyhan. Zrazumieła?» — koratka adkazaŭ jon.
Ministr i vajna
Darečy, mienavita Ihar Šunievič prydumaŭ teoryju, što suprać jaho viedamstva ŭvieś čas viadziecca infarmacyjnaja vajna.
Na dumku ministra, žurnalisty namahalisia vystavić MUS u niehatyŭnym śviatle.
«Niama ŭ nas pijar-mieniedžara, moža, treba budzie ŭvodzić takuju pasadu, kali nie skončycca hetaja infarmacyjnaja vajna», — paviedamiŭ Šunievič na pres-kanfierencyi ŭ 2016 hodzie.
