Akcyja Alesia Puškina 6 červienia.
Sud Krupskaha rajonu pryznaŭ Alesia Puškina vinavatym u praviadzieńni niesankcyjavanaj akcyi 6 červienia na hanku kramy «Eŭraopt». Sam mastak ličyć svaje dziejańni mastackim performansam, piša «Radyjo Svaboda».
6 červienia a 16:30 Aleś Puškin vyjšaŭ da kramy «Eŭraopt» u centry Krupak ź plakatami Achtung Russia! i Bloodymir! z vyjavami Pucina, a taksama plakatami Stop russian agression on Europe («Spynicie rasiejskuju ahresiju ŭ Eŭropie»), Russia — war! («Rasieja — vajna»), «Biełaruś u NATO» i ściaham Paŭnočnaatlantyčnaha aljansu. Praz paŭhadziny jaho zatrymali. Puškin admoviŭsia iści sam — i milicyjanty zaciahnuli jaho ŭ aŭtamabil siłaj. Z pastarunku jaho vydpuścili amal praz sutki.
«Mianie ledź nie pabili za pytańnie «A dzie ŭ vas tut raspuščalnaja kava?»
Pavodle Puškina, 8 traŭnia jon pryjšoŭ u krupski «Eŭraopt» i spytaŭsia ŭ pracaŭnika kramy, dzie znajści raspuščalnuju kavu. Ale toj jaho nie zrazumieŭ, źniavažyŭ biełaruskuju movu i pravakavaŭ Puškina na bojku.
«Jon vyciahnu mianie z kramy, tam dałučyŭsia jašče adzin supracoŭnik, mianie ledź nie pabili».
Paśla incydentu mastak źviarnuŭsia ŭ prakuraturu, ale tam parušeńnia zakonu nie znajšli.
«Dziaržaŭnaja systema paŭstaje na abaronu nie biełaruskamoŭnaha hramadzianina, a tych, chto parušaje zakon ab dziaržaŭnaści movy», — aburyŭsia ŭ sudzie Puškin.
Puškin raskazaŭ, što plakaty suprać Pucina zrabiŭ admysłova dla akcyi.
«Što budzie, kali Pucin daść rasiejskija pašparty takim ludziam, jak tyja supracoŭniki «Eŭraoptu»?» — skazaŭ jon u sudzie.
Kamuflažnaja forma, akulary i paviazka na tvary, pavodle Puškina, symbalizavali «vietlivych ludziej», jakija ŭ 2014-m hodzie zachapili Krym. Hetym jon chacieŭ pakazać, jak «niebiaśpiečna dla ŭsich nas, kali my nie zaŭvažajem pahrozu, jakaja idzie z uschodu».
Plakat «Biełaruś u NATO» Puškin uźniaŭ, bo ličyć, što «NATO — adzinaja siła, jakaja moža spynić zachop Biełarusi Rasiejaj», patłumačyŭ jon u sudzie.
Svajoj akcyjaj Puškin taksama chacieŭ dabicca, kab u «Eŭraopt» nabirali persanał z ulikam viedańnia biełaruskaj movy — nia tolki ŭ Krupkach, ale i va ŭsioj Biełarusi.
Aleś Puškin u sudzie.
Dazvoł va ŭładaŭ jon nia braŭ, bo ličyć akcyju mastackaj, a nie palityčnaj.
«Ujavicie: ranicaj pryjšło natchnieńnie, i ja zładziŭ płener na vašaj cudoŭnaj vulicy ŭ Krupkach. Dyk što, prasić dazvoł?»
«Maja zadača — mastackimi srodkami pryciahnuć uvahu hramadztva», — skazaŭ na sudzie Puškin.
Mastak pryznaŭ, što kali milicyjanty ciahnuli jaho ŭ słužbovy aŭtamabil, jon «pasiŭna supraciŭlaŭsia». I heta, pavodle mastaka, była častkaj mastackaj zadumki. «Kab performans praciahvaŭsia, kab potym była maksymalnaja ahałoska». Pry hetym jon adznačyŭ, što nikoha nia biŭ i nikomu škody nie nanosiŭ.
«Ja moh by inšymi spravami zaniacca». Jakuju škodu nanios Puškin milicyi
Niečakanym pavarotam u spravie stałasia rašeńnie Krupskaha RAUS, što Puškin vuličnaj akcyjaj nanios milicyi škodu. Paciarpiełym pryznali majora Vitala Tabierku, jaki zatrymlivaŭ mastaka.
Advakat Puškina Vadzim Mušynski nazvaŭ heta nonsensam.
Major Tabierka skazaŭ, što paškodžańniaŭ ad dziejańniaŭ Alesia Puškina ŭ jaho nie było. «Chiba toje, što krychu adcianuŭ našu uvahu ad niasieńnia słužby. Ja moh by inšymi spravami zaniacca», — skazaŭ paciarpieły.
U jakaści mastactvaznaŭcy ŭ sudzie vystupiŭ Valer Bujvał. Jon skazaŭ, što Puškin pravioŭ nie pikiet, a perfomans u kulturnych tradycyjach biełaruskaha narodu.
«Heta byŭ zaklik da miru, suprać vajny, akcyja nasiła jaŭny humanistyčny charaktar», — zajaviŭ Bujvał.
Što kazaŭ advakat Alesia Puškina?
- Biełarusaŭ časta pryciahvajuć da adkaznaści za vykazvańni svaich mierkavańniaŭ, u tym liku ŭ abaronu biełaruskaj movy.
- U dziejańniach Alesia Puškina nie było administracyjnaha parušeńnia.
- Jahonaje zatrymańnie było niezakonnym.
- Kali b była škoda milicyjantu, heta była b kryminalnaja sprava, ale nie administracyjnaja.
Paśla prahladu videazapisu ź miesca padziej sudździa aštrafavaŭ Puškina na 204 rubli — i za niesankcyjanavanuju akcyju, i za škodu milicyjantu.
Aleś Puškin abskardžvać prysud nia budzie: «Bajusia, kab nie dali jašče bolš».
