Vatykan vypuściŭ dakumient, u jakim žorstka raskrytykavaŭ sučasnuju kancepcyju hiendarnaj identyčnaści, pryniatuju ŭ mnohich krainach, paviedamlaje BBC. 31-staronkavy dakład nazyvajecca «Jon stvaryŭ ich mužčynam i žančynaj».
U im havorycca pra kryzis u adukacyi, a taksama adznačajecca, što sučasny padychod da hiendarnaj identyčnaści źniščaje kancepcyju pryrody i destabilizuje instytut siamji.
Jon byŭ vypuščany Kanhrehacyjaj katalickaj adukacyi ŭ jakaści navučalnaha dapamožnika dla tych, chto pracuje ź dziećmi.
Aŭtary dapamožnika zaklikajuć da dyjałohu, ale pry hetym dajuć instrukcyi pa niekatorych temach, u tym liku ŭ adras transhiendaraŭ.
U dakładzie śćviardžajecca, što sučasnyja hiendarnyja teoryi adychodziać ad pryrody i zamiest hetaha ruchajucca ŭ bok absalutnaha vybaru na asnovie pačućciaŭ čałavieka.
Taksama ŭ dapamožniku skazana, što pieramiennaja seksualnaja identyčnaść časta zasnavana tolki na «sumniŭnym razumieńni voli na asnovie pačućciaŭ i žadańniaŭ».
Jak adznačajuć aŭtary, hiendarnaja prynaležnaść pavinna vyznačacca nie čałaviekam, a Boham: «Śviatoje pisańnie pakazvaje mudraść rašeńniaŭ Stvaralnika, jaki daŭ čałavieku jaho cieła, jaho mužčynskuju i žanočuju sutnaść».
Adukacyjnyja instytuty pavinny navučać «sapraŭdnaj pryrodzie čałavieka» na asnovie vyraznaj i pierakanaŭčaj antrapałohii, havorycca ŭ dakumiencie.
Pry hetym u dapamožniku adznačajecca, što dzieci i maładyja ludzi pavinny pavažać usich ludziej, i nichto nie pavinien pakutavać ad naśmiešak i dyskryminacyi.
Amierykanskaja arhanizacyja ŁHBT-katalikoŭ New Ways Ministry nazvała dakumient škodnym instrumientam, jaki budzie vykarystoŭvacca na škodu nie tolki transhiendaram, ale taksama leśbijankam, hiejam i biseksuałam.
Kiraŭnik arhanizacyi Frensis De Biernarda adchiliŭ śćviardžeńnie pra toje, što ludzi sami vybirajuć svoj poł.
U svajoj zajavie jon adznačyŭ, što dakumient zabłytaje tych, chto pakutuje ad prablem z hiendarnaj identyčnaściu i seksualnaj aryjentacyjaj.
Pavodle jaho słoŭ, Vatykan u hetym pytańni viartajecca ŭ siaredniaviečča.
