5 červienia zachodnija ŚMI paviedamili pra novyja śviedčańni supracoŭnictva Kitaja i Saudaŭskaj Aravii ŭ pabudovie balistyčnych rakiet dalokaha absiahu dziejańnia. KNR pastaŭlała padobnyja rakiety saudaŭcam ad 1980-ch, ale, jak miarkujuć zachodnija analityki, u apošnija miesiacy raspačaŭsia novy i vielmi intensiŭny etap supracy, jaki moža zabiaśpiečyć Er-Ryjad nośbitam dla atamnaj zbroi. Pry hetym amierykanskaje kiraŭnictva pabłažliva ihnaruje apošnija paviedamleńni pra kaapieracyju adnaho sa svaich blizkich sajuźnikaŭ i adnaho sa svaich hałoŭnych praciŭnikaŭ. Niahledziačy na mahčymyja nastupstvy dla abvastreńnia kryvavaha supraćstajańnia Irana i Saudaŭskaj Aravii ŭ rehijonie.
A za paru dzion da raskryćcia kitajska-saudaŭskich hiešeftaŭ, 30 maja, ahienctva navinaŭ «Błumbierh» paviedamiła, što Rasija admoviłasia pradać Iranu sistemu supraćpavietranaj abarony S-400. «Błumbierh» miarkuje, što zapyt byŭ zrobleny padčas vizitu iranskaha ministra zamiežnych spraŭ Zaryfa ŭ Maskvu na pačatku maja, i admoviŭ jamu asabista Pucin.
Kali nie ličyć doŭhaj i pakutlivaj pastaŭki Tehieranu sastarełaj sistemy S-300, što zaviaršyłasia try hady tamu, Kreml užo daŭno prysłuchoŭvajecca da pažadańniaŭ Zachadu datyčna Irana i spyniŭ prykmietnyja pastaŭki zbroi Tehieranu jašče na pačatku 2000-ch. Zrešty, i KNR spyniła ich pryblizna tady ž.
Pry ŭsich śpiekulacyjach pra zaniapad amierykanskaha vaładarstva i blizki pačatak «kitajskaj ery» va ŭsim śviecie, vyšejapisanaja situacyja śviedčyć pra inšaje. Nichto nie hatovy pastaŭlać zbroju Iranu, kab nie razhnievać Vašynhton. Navat krainy, jakim prypisvajuć rolu apanientaŭ ZŠA i jakim tearetyčna musić być cikava naładzić kali nie chaŭrus, dyk niejkaje ŭzajemadziejańnie z šyickim revalucyjnym režymam. Zamiest hetaha KNR razvažliva pastaŭlaje rakiety, pryčym samaha ryzykoŭnaha typu, saudaŭcam, vyprabavanym prychilnikam śvietu pad kiraŭnictvam ZŠA, jakich prairanskija siły daŭno beściać za «amierykanski isłam».
Rasija ž zmahajecca za honar pastavić S-400 Tureččynie. Taja, viadoma, spračajecca z Vašynhtonam pa niejkich pytańniach — choć chto ź im nie spračajecca paśla źjaŭleńnia Trampa ŭ Biełym domie — ale nie pierastaje być čalcom NATA dy inšych struktur, vybudavanych pad patreby mižnarodnaj supolnaści na čale z ZŠA.
Karcinka «Chto ŭ hłabalnym domie haspadar?» robicca jašče bolš vyraznaj, kali ŭzhadać, što jašče hadoŭ tryccać tamu navat takija blizkija amierykanskija sajuźniki, jak Japonija, Francyja ci Hiermanija, albo ŭvohule zaležnaja ad amierykanskaha vajskovaha prykryćcia Paŭdniovaja Kareja adkryta ihnaravali amierykanskija sankcyi suprać taho ž Irana. Siońnia ž navat samyja hałaślivyja apanienty amierykanskaha ŭrada ŭ śviecie schilnyja vykazać zakłapočanaść, a paśla cichieńka zhadzicca ź im pa pytańniach, što tyčacca hłabalnaha paradku i jaho parušalnikaŭ. I sprava tut palahaje navat nie ŭ mahutnaści amierykanskaje dziaržavy, a ŭ tym, što hłabalizacyja ŭ ramkach stvoranych zachodnimi elitami mižnarodnych režymaŭ i raznastajnych intehracyjnych abjadnańniaŭ dazvoliła zachodnim elitam ŭsio lepš i lepš kantralavać pieryfieryju śvietu. Navat tuju, jakaja imkniecca stać niepieryfieryjaj, jak to KNR i Rasieja.
Tamu nie važna, na kolki źniziłasia dola Zachadu ci ZŠA ŭ hłabalnym VUP ci spažyvańni, čamu ciešyŭsia nadoječy rasiejski prezident Pucin na pieciarburhskim ekanamičnym forumie. Važna toje, što pahardžańnie mižnarodnymi praŭnymi ramkami Zachada ciapier imhnienna pazbaŭlaje bujny biznes i cełyja krainy mahčymaści zarablać ci navat prosta spakojna funkcyjanavać, bo vykidaje ich ź mižnarodnych płaciežnych sistem, nie dazvalaje pazyčać hrošy na zachodnich rynkach, nie kažučy ŭžo ab dostupie da bolš jomistych zachodnich rynkaŭ, bolš prasunutych zachodnich technałohij i mnohaha inšaha. Bolš za toje, niezachodnija elity zbolšaha nie ryzykujuć kidać vyklik ZŠA i z asabistych mierkavańniaŭ — bo trymajuć svaje bahaćci, vučać dziaciej dy baviać čas sami na Zachadzie.
«Amierykanskaja era» niekali skončycca, jak i inšyja takija epochi. Ale pakul kanca joj nie vidać.