U Minsku na Zybickaj, 4 adkryŭsia novy bar Kalinoŭski. Tam pabyvaŭ žurnalist Franak Viačorka, zastaŭsia zadavoleny i napisaŭ vialiki post u fejsbuku.
Fota: Franak Viačorka
«Zavitaŭ u novy modny patryjatyčny bar na Zybickaj — Kalinouski Bar. Kusaju łokci, što zrabiŭ heta nia ja. Prykładna 12 hadoŭ tamu my z moładździu ładzili kampaniju pa papularyzacyi Kalinoŭskaha i stvareńnia ź jaho symbalu baraćby za Svabodu i Niezaležnaść, jaki natchniaŭ by i abjadnoŭvaŭ. I tady my havaryli, maŭlaŭ, było b dobra mieć u Miensku taki padpolny pab, dzie ŭvachod tolki pa paroli: «Kaho Lubiš? Lublu Biełaruś».
Fota: Franak Viačorka
Pab adkryli, i nie padpolny, a ŭ samym sercy Zybickaj, na miescy byłoj burhiernaj. I adkryŭ jaho pradprymalnik Alaksiej Słavuta, za što jamu respekt i padabajki.
Fota: Franak Viačorka
Dyzajn šykoŭny. Na ścienach — cytaty z «Mužyckaj praŭdy», asabliva važnaja: «Nie narod dla ŭrada, a ŭrad — dla naroda». Lahatyp — Ū, to bok u nieskładovaje łacinkaj. Meniu nazyvajecca — «Kaktelnaja praŭda». Napoi — aŭtarskija nastojki i kaktejli ź biełaruskimi nazvami miesiacaŭ. Paŭsiul adsyłki da asoby Kalinoŭskaha i hodu paŭstańnia — «1863». Usio azdableńnie — pa-biełarusku. Detali — taksama pradumanyja: naprykład, na stałach stajać kałaski ŭ vazačcy. Mabyć, paŭstanskija.
Foto: Franak Viačorka
Z hetym baram — Zybickaja znoŭ nabyła dla mianie sens. Davajcie padtrymajem dobruju inicyjatyvu, dzialiciesia pastom i prychodźcie».
Foto: Franak Viačorka
Jak paviedamili Franaku supracoŭniki, interjer jany prydumali svaimi siłami, biez zaprašeńnia prafiesijnaha dyzajniera.
Fota: Franak Viačorka
U kamientach, źviartaje ŭvahu The Village Biełaruś, pišuć, što bar adkryŭsia amal nasuprać turmy, kudy sadžali paŭstancaŭ Kalinoŭskaha. Heta praŭda: carskija ŭłady pierad sudom trymali paŭstancaŭ ŭ budynkach klaštaraŭ Vierchniaha horada.
