Žurnalistka kazachstanskaha vydańnia tengrinews.kz pabyvała ŭ domie baćkoŭ ukrainskaha prezidenta.
Radzima šostaha prezidenta Ukrainy Uładzimira Zialenskaha — transpartny vuzieł i pramysłovy horad Kryvy Roh, u jakim siońnia žyvuć jaho baćki: Ryma Uładzimiraŭna i Alaksandr Siamionavič.
Baćkoŭski dom — čatyrochpakajovaja kvatera ŭ savieckim šmatpaviarchoviku, takich damoŭ-murašnikaŭ pa byłym Sajuzie tysiačy, kali nie bolš.
Vulica Ziamlački, ścipły dvor, pryparkavanyja biudžetnyja aŭto. Žurnalistka ŭbačyła, što nijakaj achovy ŭ domie baćkoŭ prezidenta nie było.
«Vam, napeŭna, ramont u domie zrobiać, dy i horad padłatajuć?» — spytała žurnalistka.
«Kali tolki nam — to nie treba. Kali rabić, to ŭsim, pa ŭsioj Ukrainie patrebien ramont. Dy pierastańcie, my prostyja ludzi», — adkazaŭ baćka Uładzimira Zialenskaha.
Ścipłaja, ale ŭtulnaja kvatera, šmat čyrvonaha koleru — mebla, dyvany.
«Heta Rymačka lubić», — tłumačyć Alaksandr Siamionavič, znajomić z žonkaj i pravodzić karotkuju ekskursiju.
Baćki Zialenskaha — piensijaniery pa ŭzroście, ale baćka praciahvaje vykładać u Kryvarožskim ekanamičnym instytucie.
Taksama jon adznačyŭ, što jon i žonka Ryma Uładzimiraŭna admaŭlajucca ad pastajannych prapanoŭ z boku syna pierajechać u Kijeŭ.
Sam Alaksandr Siamionavič, jaki źjaŭlajecca zahadčykam kafiedry infarmatyki i infarmacyjnych technałohij, śćviardžaje, što niadrenna atrymlivaje. Da taho ž, u jaho jość piensija.
— Ja niadrenna atrymlivaju, u mianie piensija. Jon sam zaŭsiody prapanuje, to mašynu chacieŭ kupić, to ŭ Kijeŭ klikaŭ. Ja nie chaču, a jon letam vyšturchvaje nas adpačyvać za svoj košt, voś zuby mnie pastaviŭ. Ja nie vielmi prychilnik hetych rečaŭ. Ja ścipły čałaviek. A što treba, płavalny basiejn, ci što? Kudy jašče, u restaran? Nu nam i hetaha nie treba. Jana vydatna hatuje! Što nam treba? Zdaroŭje i ŭsio, — raspavioŭ baćka Uładzimira Zialenskaha.
Havoračy pra palityku Uładzimira Zialenskaha, jaho baćki adznačyli, što chočuć bačyć mir u krainie. «Nu, kali jon kaža «ahresar» pra Rasiju, mnie nie padabajecca takoje słova. Ale ja tonkaściaŭ nie viedaju, moža, heta tak treba», — pryznaŭsia Zialenski-starejšy.
