U paniadziełak litoŭskija kansiervatary zaklikali hiermanskaha hihanta pa vytvorčaści spartyŭnaha adzieńnia Adidas spynić handal adzieńniem z savieckaj simvolikaj, piša Delfi.
Taki zvarot palityki nakiravali ŭ suviazi z tym, što ŭ sacyjalnych sietkach pačali raspaŭsiudžvacca fota, dzie vidać, jak u kramach Adidas u Łondanie vystaŭleny žanočyja majki z hierbam SSSR.
«Mižnarodnyja karparacyi pavinny ŭličyć histaryčnyja fakty, pavažać pamiać achviar i ŭstrymacca ad zaachvočvańnia savieckaj nastalhii ci apraŭdańnia złačynstvaŭ, učynienych tatalitarnymi režymami», — havorycca ŭ zvarocie lidara kansiervataraŭ i jaho namieśnika.
«U śviecie by sapraŭdy nie zrazumieli, kali b Adidas vyrabiŭ tematyčnuju liniju adzieńnia z nacysckaj simvolikaj, adnak čamuści na savieckija znaki zapluščvajuć vočy. My pierakananyja, što jość i inšyja sposaby śviatkavańnia spartyŭnych pieramoh, a nie ŭsłaŭleńnie režymu, adkaznaha za śmierci i pakuty miljonaŭ», — havorycca ŭ zvarocie.
Litva była akupavanaja SSSR u 1940-1941 i ŭ 1944-1990 hadach.