Siabry, kalehi i čytačy Vasila Bykava ŭskłali kvietki na jahonuju mahiłu na Uschodnich mohiłkach Mienska, piša Radyjo Svaboda.
Da pomnika-vałuna, pryviezienaha na mahiłu biełaruskaha kłasika ź Finlandyi, ludzi ŭskłali ŭlubionyja kvietki Bykava — vałoški. A taksama bieła-čyrvona-biełyja ružy, hvaździki i ramonki
Staršynia Sajuzu biełaruskich piśmieńnikaŭ Barys Piatrovič prynios na mohiłki tolki što vydadzienuju druhuju knihu 10-ha toma zboru tvoraŭ kłasika.
«My da jubileju vydali druhuju knihu 10-ha toma zboru tvoraŭ. Nieŭzabavie vyjdzie i treciaja kniha 10-ha toma. Dumali abmiežavacca 14-tomnikam, ale nie atrymlivajecca, nie raźličyli niekali, što spadčyna Bykava značna-značna bolšaja», — skazaŭ Piatrovič.
Barys Piatrovič taksama paviedamiŭ, što va Ŭkrainie ŭ vydaviectvie «Znańnia» da 95-hodździa Bykava vyjšła try jahonyja knihi — «Alpijskaja balada», «Znak biady» i «Miortvym nie balić», dzie zhadvajecca Kiravahradčyna, dzie Bykaŭ faktyčna byŭ pachavany pieršy raz.
Barys Piatrovič vykazaŭ škadavańnie, što ŭ haradach, dzie Bykaŭ žyŭ — Ušačach, Viciebsku, Horadni, Miensku — dahetul niama ni pomnika, ni vulicy jaho imia:
«Hrešnym słovam skažu: moža, i dobra, što niama, bo nazvali b vulicu niedzie na ŭskrajku, a potym daviałosia b pieranazyvać. Lepš chaj pry hetaj uładzie pakul nia budzie vulicy, a pry inšaj centralny praspekt nazavuć jahonym imiem».
«Pomniki budzie stavić narod, i vulicy budzie nazyvać narod», — skazaŭ Barys Piatrovič.
Siabar Vasila Bykava paet Siarhiej Zakońnikaŭ nahadaŭ, što ŭ 1990-ja hady była niehałosnaja zabarona na drukavańnie tvoraŭ Vasila Bykava, i drukavalisia jany tolki ŭ časopisie «Połymia», hałoŭnym redaktaram jakoha jon byŭ.
«Pracujučy ŭ adździele kultury CK KPB, mnie daviałosia ŭstupać u palemiku z mnohimi našymi cenzarskimi strukturami, ažno da Hałoŭlita SSSR. A kali ja ŭznačaliŭ «Połymia», u mianie była ŭžo padtrymka samoha Bykava. Za hetyja hady my nadrukavali ŭsio, što vyjšła z-pad jahonaha piara.
U jaho jość try rečy: praŭda, pravilny vybar u žyćci i adstojvańnie ŭsich pryncypaŭ prystojnaści. I paśla Bykava nielha było ŭžo pisać, jak pisali raniej Hieorhi Markaŭ dy inšyja. U hetym jahonaja najvialikšaja zasłuha dla litaratury», — padkreśliŭ Siarhiej Zakońnikaŭ.
Były deputat Viarchoŭnaha Savietu Biełarusi 12-ha sklikańnia Siarhiej Navumčyk zajaviŭ, što dla ŭsioj frakcyi BNF u parlamencie na čale ź Zianonam Paźniakom Vasil Bykaŭ byŭ nieparušnym aŭtarytetam.
