Nakolki cikavaja biełaruskaja mova naviedvalnikam našaj krainy? Ci stanie biełaruskaj movy bolš dziakujučy turystam i ci varta rychtavacca adkazvać zamiežnikam pa-biełarusku pra najbližejšyja bankamaty? Ci moža być naša mova pryvabnaj turystyčnaj źjavaj?
Stvaralniki SAY.BY padyšli da hetaha pytańnia hruntoŭna i ŭ samy prydatny momant, kali ŭ našaj krainie čakajecca vialiki napłyŭ turystaŭ, zapuskajuć anhłamoŭnuju viersiju prafiesijna ahučanaha biełaruskaha razmoŭnika ŭ vyhladzie mabilnaha dadatka dla Android i iOS, a taksama, u supracoŭnictvie z arhanizatarami Jeŭrapiejskich hulniaŭ, pačynajuć raspaŭsiudžvać admysłovyja buklety ź biełaruskimi vyrazami.
Nakład bukletaŭ — 30 000 asobnikaŭ. 20 000 ź ich buduć razdavacca turystam na infarmacyjnych punktach Jeŭrapiejskich hulniaŭ, astatnija 10 000 — u biełaruskich hatelach i kaviarniach.
Akcent zrobleny na najbolš užyvanych vyrazach uštodzionnych razmovach. Usiaho ŭ mabilnym dadatku naličvajecca amal 500 vyrazaŭ, ahučanych jak žanočym, tak i mužčynskim hałasami z mahčymaściu vybaru. Dla zručnaści i chutkaha ŭjaŭleńnia, jak hučyć toje ci inšaje słova, akramia ahučvańnia była dadadziena i anhlijskaja tranślitaracyja.
Nad samim razmoŭnikam pracavali prahramisty, dyzajniery, ilustratar — biełarusy tutejšyja i biełarusy zamiežža — što ŭ svaju čarhu dało mahčymaść pravieryć čytelnaść bukleta i zručnaść vykarystańnia mabilnaha dadatka niepasredna na inšaziemcach: na anhličanach, niemcach, irłandcach, hałandcach i kanadcach.
Sačyŭ za pravilnaściu biełaruskaj movy Instytut movaznaŭstva imia Jakuba Kołasa Nacyjanalnaj akademii navuk Biełarusi, a tytaničnuju pracu pa ahučvańni ŭziali na siabie admysłoŭcy z gavarun.by, jakija zajmajucca prafiesijnym ahučvańniem filmaŭ na biełaruskuju movu.
Akramia razmoŭnikaŭ, u mabilnym dadatku možna znajści miescy, u jakich jak z turystami, tak i ź biełarusami mohuć razmaŭlać pa-biełarusku. Heta aŭtentyčnyja biełaruskija restarany i kaviarni, kramy suvieniraŭ i inšyja miescy. I kali da ich pryjdzie zamiežny turyst i sa ščyraj uśmieškaj skaža «Vitaju!», tam abaviazkova adkažuć uzajemnaściu.
Mabilny dadatak dastupny praz Apple App Store i Google Play. A jakaja viersija budzie dastupnaja vam — anhlijskaja abo biełaruskaja — zaležyć ad naładaŭ łakalizacyi vašaha telefonu, a taksama zaŭsiody možna pamianiać movu i ŭ naładkach samaha dadatka.
