U Maładziečanski RAUS pastupiła paviedamleńnie ad fielčara chutkaj dapamohi. Jon raspavioŭ, što z ranaj na hałavie ŭ balnicu byŭ dastaŭleny 14-hadovy školnik. U abstavinach incydentu stali raźbiracca pravaachoŭniki.

Akazałasia, pjany baćka vyrašyŭ pravieści z synam vychavaŭčuju hutarku. Jon vykinuŭ dziciačyja krasoŭki na vulicu. Na svarku prybiehła maci, jakaja zastupiłasia za syna, maŭlaŭ, kali vychoŭvać, to ŭ ćviarozym stanie.

Žančyna ledź nie atrymała ŭdar. Maci abaraniła dzicia, adšturchnuŭšy ŭ bok baćku. Baćka dahnaŭ syna i ŭdaryŭ jaho pa hałavie šuflikam.

Ubačyŭšy skryvaŭlenaje dzicia, maci akazała pieršuju dapamohu i vyklikała miedykaŭ, ale ŭ milicyju pra incydent nie paviedamlała. Chłopčyka dastavili ŭ dziciačuju balnicu. Zhodna ź miedycynskim zaklučeńniem, školniku byli naniesieny lohkija cialesnyja paškodžańni.

Za try hady heta pieršaje paviedamleńnie ŭ milicyju pra skandał u siamji ź vioski Hierduciški Maładziečanskaha rajona. Raniej jana była ŭ śpisie siemjaŭ, jakija znachodziacca ŭ sacyjalna-niebiaśpiečnym stanoviščy. Ale prafiłaktyčnaja praca dała svoj vynik — baćki zakadziravalisia, atmaśfiera ŭ siamji naładziłasia.

Siamja znoŭ ryzykuje trapić u hetuju katehoryju i, jak ličać pravaachoŭniki, patrabuje pastajannaha kantrolu.

U dziejańniach baćki pravaachoŭnikami byli ŭhledžany prykmiety składu złačynstva, praduhledžanaha artykułam 153 KK Respubliki Biełaruś «Pryčynieńnie lohkaha cialesnaha paškodžańnia». U haspadarcy jon pracuje pamočnikam kambajniera.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?