U Minsku pabudujuć jašče adzin piešachodny most nad Śvisłačču. Jon złučyć budučy šmatfunkcyjanalny kompleks na miescy 2-j kliničnaj balnicy i Vierchni horad, paviedamlajuć Minsk-Naviny.
Jak raspavioŭ kiraŭnik prajektnaj arhanizacyi Aleh Varabjoŭ, kanstrukcyja budzie ŭ vyhladzie arki, heta ŭmova była zadadziena pieršapačatkova, kab pad mastom možna było čyścić pojmu raki z dapamohaj śpiecyjalnaj techniki.
— Most atrymaŭsia davoli kruty pa ŭzdymie, tamu jaho zrobiać z padahrevam i antyślizhajučym pakryćciom, šyrynia kanstrukcyi — 3,7 mietraŭ, — udakładniŭ A. Varabjoŭ. — U nas było šmat varyjantaŭ aharodžy, navat vantavaha, ale zakazčyk spyniŭsia na takim — z kartenaŭskaj stali.
Jak rastłumačyli architektary, heta darahi i dobry materyjał. Jon pa vyhladzie nahadvaje praržaviełaje žaleza, ale za košt pakryćcia z admysłovaha sastavu stal nie schilnaja da karozii, kanstrukcyi ź jaje nie pakinuć razvodaŭ i padciokaŭ. Heta darahi i jakasny sučasny materyjał, ź jakoha robiać navat fasady budynka.
Pakolki vyhlad takoj stali niazvykły, jość adčuvańnie staroha žaleza, to pytańnie - ci budavać padobnuju aharodžu vynieśli na kalektyŭnaje rašeńnie savieta.
- Mnie padabajecca, što takija kanstrukcyi buduć vyhladać uvieś čas pa-roznamu, i takim prostym pryjomam možna damahčysia raznastajnaści ŭsprymańnia, - vykazałasia architektar Halina Palanskaja.
Uchvalili členy savieta i padahreŭ mosta, i jaho padśviatleńnie, i ažurnaść kanstrukcyi. Prajektnaj arhanizacyi paraili tolki zakruhlić pramyja kuty na padychodach da mosta, zrabiŭšy ich bolš płyŭnymi.
