Prezident ZŠA Donald Tramp zapłanavaŭ sustreču z ukrainskim lidaram Uładzimiram Zialenskim u Varšavie. Pra heta paviedamiŭ u Kijevie daradca amierykanskaha prezidenta pa pytańniach nacbiaśpieki Džon Bołtan, pieradaje «Ukrajinśka pravda».
«My raźličvajem, što ŭ prezidentaŭ budzie mahčymaść pahavaryć u Varšavie ŭ ramkach mierapryjemstvaŭ z nahody 80-hodździa pačatku Druhoj suśvietnaj vajny», — skazaŭ Bołtan. Sustreča palitykaŭ adbudziecca, choć i aficyjna nie anansavana, zajaviŭ jon.
«Ja aptymistyčny adnosna sustrečy ŭ Varšavie. U lidaraŭ užo byli dźvie vielmi ciopłyja hutarki, i ŭ ich znoŭ budzie šaniec pahavaryć, choć nie viedaju, nakolki praciahłaj budzie sustreča, uličvajučy zaniataść u cyrymonijach», — dadaŭ jon.
