Sajuz biełaruskich piśmieńnikaŭ śpiecyjalna da Dnia viedaŭ padrychtavaŭ školnikam fajny padarunak — animacyjny film «Ad Skaryny pačatak… Piać stahodździaŭ našaj knihi».
U im uznoŭlenaja srodkami animacyi, historyja biełaruskaha knihadruku prachodzić pierad vačyma hledačoŭ za try chviliny.
«Psałtyr» Franciška Skaryny, Statuty VKŁ, padpolnyja vydańni Kastusia Kalinoŭskaha, našaniŭskaja para, epocha biełarusizacyi i pieršaja Nobieleŭskaja premija pa litaratury — usie hetyja padziei znajšli adlustravańnie ŭ animacyjnym filmie. Bo biełaruskaja kniha, na dumku stvaralnikaŭ multfilma, abjadnoŭvała našu nacyju i ruchała jaje napierad. Dziakujučy tvorcam, vydaŭcam i raspaŭsiudnikam drukavanaha słova sto hadoŭ tamu paŭstaŭ masavy biełaruski ruch, praciaham i vynikam jakoha stała niezaležnaść BNR.
«A dziakujučy nabytkam biełarusizacyi, acalełym paśla časoŭ stalinskaha teroru, uźnikła pierajemnaść pakaleńniaŭ, drukavanaje słova spadarožničała biełarusam u škole i doma da paŭstańnia sučasnaj niezaležnaj Biełarusi. Historyja biełaruskaj knihi praciahvajecca, i kožny z nas moža ŭpisać u hetuju historyju svaju ŭłasnuju staronku», — kaža Barys Piatrovič, staršynia SBP.
Animacyjny film stvorany na zamovu Sajuza biełaruskich piśmieńnikaŭ kreatyŭnym ahienctvam «Małako» (kancepcyja, režysura, pradakšn). Ahučvaŭ animacyjny film akcior Kupałaŭskaha teatra Alaksandr Małčanaŭ pad režysuraj Ramana Padalaki. Partnior — hramadskaja kampanija «Budźma biełarusami!»
