Niadaŭna adzin pavažany čałaviek paskardziŭsia na chamskaje abychodžańnie ŭ polskim konsulstvie padčas intervju na «kartu palaka». Maŭlaŭ, nijakaj pavahi da ŭzrostu i dzie chvalonaja kultura…

Pakiniem u baku pryčyny, pa jakich ludzi źjazdžajuć za miažu ci prykidvajucca «palakami». Urešcie, žyćcio adno, a RB — nie najlepšaje miesca na śviecie dla žyćcia, kali vam zaminajuć žyć takija «rudymienty», jak pačućcie ŭłasnaj hodnaści… a jašče ž jość dzieci — hałoŭny ruchavik našych rašeńniaŭ.

Ale praŭda žorstkaja. Kali my sami nie majem pavahi da siabie i, jak žabraki, vymolvajem u panoŭ «prava palakam zvacca», darma raźličvać na niejkuju pavahu ź ich boku. Heta adviečny ludski zakon: chočaš, kab pavažali inšyja, spačatku pavažaj siabie sam.

Palaki ž taksama nie durnyja i ŭsio razumiejuć, kamu karty dajuć, ale za naš rachunak realizoŭvajuć svaje mety. Takaja častka «akartkavanych» ci ich dzieci, jaki pierajeduć u RP, arhanična ŭlijucca ŭ polski etnas: bałazie biełarusy asimilujucca za adno pakaleńnie. Tyja, što zastanucca, buduć dadatkovym kozyram dla Polščy ŭ biełaruska-polskich dačynieńniach. U polskich ŚMI i tak zaŭsiody pišuć pra miljony palakaŭ u Biełarusi, jakim admaŭlajuć u pravie razmaŭlać pa-polsku.

Paradoks u tym, što na našych ziemlach NIKOLI nie było vialikich hrup palakaŭ, nie zafiksavana ŭ historyi masavych pierasialeńniaŭ z etničnych polskich terytoryj, Statut naŭprost zabaraniaŭ palakam vałodać ziamloj u VKŁ. Mižvajenny čas nie ličycca, bo asadniki, čynoŭniki, vajskoŭcy ci nastaŭniki ŭ pieravažnaj bolšaści ŭ Biełarusi nie zastalisia.

Byli i zastalisia ludzi biez vyraznaj nacynalnaj identyčnaści, jakich praź ich katalickaść «zapisali ŭ palaki». Minuli dziesiacihodździ, i ciapier akazałasia, što možna vyhodna abmianiać «kaścielnuju polskaść» na sapraŭdnuju «kartu palaka»! Tolki vyhladaje heta, jak prodaž pieršarodstva za misku sačyŭki.

Naŭrad ci naša šlachta, jakaja masava pierachodziła ŭ kanjunkturna vyhodnaje katalictva i pierachodziła na polskuju movu, mahła ŭjavić, što ich naščadki ŭ XXI stahodździ buduć ličycca palakami, bo ž «My Litviny!», ale historyja daviała advarotnaje. U ciapierašniaj situacyi z «kartami» možna pravieści vyraznyja paraleli.

Zastajecca spadziavacca, što pryjdzie ŭsio ž čas, kali nie zastaniecca bolš na našaj ziamli ruin, asabliva hałoŭnaj Ruiny — našaj hodnaści. Bo, padobna, «ludźmi zvacca» my tak i nie pačali.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?