Na kraŭdfandynhavaj płatformie «Mołamoła» idzie zbor srodkaŭ na biełarusizacyju ŭsich cerkvaŭ krainy praz vydańnie i raspaŭsiud 150 najlepšych biełaruskamoŭnych chryścijanskich chitoŭ na mp-3 dyskach, USB i praz QR-kody. Na hety momant z patrebnych 6400 rubloŭ sabrana 2040, pieravažna pryvatna. Najbolš achviaravali biełarusy zamiežža.

«U bolšaści pravasłaŭnych i pratestanckich cerkvaŭ Biełarusi, a taksama ŭ niekatorych kaściołach nie hučyć biełaruskaja mova. Heta robić chryścijanskuju supolnaść uraźlivaj pierad rasijskaj prapahandaj i asłablaje niezaležnaść Biełarusi,» — ličać arhanizatary.

U Biełarusi — kala 3000 carkoŭnych prychodaŭ, parafijaŭ, hramadaŭ. Ideja ŭ tym, kab kožnaja pravasłaŭnaja, katalickaja, pratestanckaja hramada biaspłatna atrymała kalekcyju 150 najlepšych biełaruskamoŭnych chryścijanskich śpievaŭ — zbornik «Biełaruski chryścijanski chit» u farmacie mp-3 z QR-kodam dla spampoŭvańnia albo USB-fłešku. Buduć nadrukavanyja infarmacyjnyja paštoŭki i płakaty z QR-kodam dla spampoŭvańnia zbornika — dy biaspłatna pieradadzienyja ŭ chryścijanskija hramady dla raspaŭsiudu i raźmiaščeńnia na infarmacyjnych stendach.

Z adnaho boku, heta paspryjaje biełarusizacyi cerkvaŭ i bolš vysokaj śviadomaści ŭsich kanfiesijaŭ u słužeńni narodu Biełarusi. Z druhoha boku, cerkvy atrymajuć ceły skarb śpievaŭ prasłaŭleńnia, chryścijanskich himnaŭ, baładaŭ, śpievaŭ na Rastvo, Vialikdzień dy inšyja śviaty. Pa-treciaje, zbornik, jaki maje mižkanfiesijny charaktar, paspryjaje supracy i ładu pamiž pravasłaŭnymi, katalikami i pratestantami Biełarusi,» - śćviardžaje kamanda prajektu.

«Biełaruski chryścijanski chit» — muzyčnaja sieryja, jakaja była zasnavanaja ŭ 2008 hodzie. Na praciahu dziesiaci hadoŭ pravasłaŭny Pavieł Sieviaryniec, pratestantka Valancina Šyčko i katalička Volha Sieviaryniec sabrali i vydali bolš za 150 najlepšych biełaruskich chryścijanskich śpievaŭ. Śpiarša byli «Chryścijanskija himny» (2008), «Chity prasłaŭleńnia» (2009), zbornik kaladnych chitoŭ «Chrystos naradziŭsia!» (2009), vielikodnych «Chrystos uvaskros!» (2010), składanki «Bardaŭski chryścijanski chit» (2010) i «Biełaruski pilihrymski chit» (2014), zatym — albom patryjatyčnych chitoŭ «Lublu Biełaruś» (2016) i «Biełaruski chryścijanski rok» (2018).

U «Biełaruskim chryścijanskim chicie» ŭdzielničajuć Źmicier Vajciuškievič i Vinsent, Alesia Unukoŭskaja i «Tezaŭrus», «Niebaschił» i «Laŭdans», Inesa Leadanskaja i Andruś Mielnikaŭ, «Psalmiary» i «DVA», Hanna i Jadviha Bahdanovičy, Vadzim Jatkoŭski i «Ryby», a taksama šmat inšych viadomych vykanaŭcaŭ.

Siarod aŭtaraŭ tekstaŭ «Biełaruskaha chryścijanskaha chita» — Uładzimir Karatkievič, Ryhor Baradulin, Janka Kupała, Natalla Arsieńnieva, Łarysa Hienijuš, Lavon Volski.

Zaprašajem padtrymać!

Клас
0
Панылы сорам
0
Ха-ха
0
Ого
0
Сумна
0
Абуральна
0