U Biarozaŭskim rajonnym sudzie pačaŭsia praces u hučnaj spravie ab avaryi, u jakoj zahinuli troje dziaciej i dvoje darosłych. 7 lipienia ŭ kanał pad Biełaaziorskam ulacieŭ «Mersedes», u jakim było ažno 10 čałaviek. Vyratavalisia 5 darosłych, u tym liku kiroŭca Andrej Bukraba, piša Radyjo Svaboda.

Ciapier jaho vinavaciać ŭ parušeńni praviłaŭ darožnaha ruchu, u vyniku čaho zahinuli 5 čałaviek. Kiroŭcu pahražaje da 10 hadoŭ źniavoleńnia.

«Sprabavaŭ napisać listy, pavinicca»

Andrej Bukraba adrazu pryznaŭ vinu pa ŭsich punktach. Pryznaŭsia, što byŭ niećviarozy (ekspertyza pakazała, što na momant avaryi ŭ jaho kryvi było 1,59 pramile alkaholu), što pieravysiŭ chutkaść (jechaŭ pa hruntovaj darozie ŭzdoŭž kanała amal 90 kilametraŭ na hadzinu), što nie ŭličyŭ asablivaści darožnaj abstanoŭki (rezki pavarot) i dazvoliŭ sieści ŭ aŭtamabil (u jahonym kiravańni byŭ darahi Mersedes GL) bolš jak 4 pasažyram. Dvoje ź ich pamiaścilisia ŭ bahažniku ŭniversała — pavodle Andreja Bukraby, jon sam adčyniŭ im zadnija dźviery.

«Tak, pryznaju vinu całkam», — skazaŭ padsudny ŭ samym pačatku dopytu. Ale čamu ŭsio tak adbyłosia, pałumačyć nia moža. Śćviardžaje, što ŭ toj dzień, 7 lipienia, nia braŭ u rot śpirtnoha, a tyja 1,59 pramile, jakija znajšli ŭ jahonaj kryvi, zastalisia ad užyvańnia piva i harełki ŭviečary 6 lipienia.

«Tady vypiŭ 1,5-2 litry piva i 200 hramaŭ harełki. Piva piŭ u chacie, a harełku ź siabram u horadzie. Da nočy viarnuŭsia damoŭ i adpačyvaŭ. Za rul sieŭ kala 9 ranicy», — paviedamiŭ sudu Andrej Bukraba. Hety raspovied padsudnaha ŭ zali byŭ sustrety hułam — svajaki i siabry paciarpiełych u versiju pra 1,5 litra piva i 200 hramaŭ harełki nia vierać. Sudździa musiła prasić cišyni ŭ zale.

Pra momant, kali aŭtamabil, na jakim Bukraba vioz z dačnaha pasiołka «Jabłyńka» 9 pasažyraŭ i palacieŭ u kanał, jon uspaminaje vielmi niešmatsłoŭna. Pahadžajecca, što ništo nie pieraškadžała — było śvietła, viedaŭ darohu. Ale čamu hetak pahnaŭ i čamu svaječasova nie prytarmaziŭ pierad pavarotam, nia viedaje. Urešcie paśla niekalkich pytańniaŭ prakurora vykładaje takuju versiju: usio syšłosia — i chutkaść, i asablivaści darohi, i toje, što mašyna była pierahružanaja. Svoj asabisty stan u toj momant Bukraba acaniŭ jak narmalny.

«Ja paśpieła dvojčy kryknuć «Andrej, tarmazi!» I ŭsio, my valimsia ŭ kanał»

Inšaj vyhladaje versija zdareńnia z vusnaŭ paciarpiełaj Kaciaryny Bycko. Jaje 4-hadovaja dačka i 9-hadovy syn nia vypłyli z patanułaha aŭtamabila. Kaciaryna paćvierdziła słovy Bukraby, što jon nia piŭ u toj dzień. Va ŭsiakim razie na leciščy, kudy pryjechaŭ, kab advieźci ŭsiu kampaniju za horad.

«A my pili piva», — skazała pra ŭžyvańnie śpirtnoha na leciščy Kaciaryna. Pavodle jaje, Andrej Bukraba vyhladaŭ narmalna, «usio było dobra». Jana nia čuła, kab jon piarečyŭ prapanovie pajechać z dačy (haspadary zastavalisia) usioj kampanijaj haściej na adnym aŭtamabili.

«Sieli narmalna, pamiaścilisia ŭsie, mašyna vialikaja. Dziaciej uziali na ruki. Ja nie pryšpilałasia. Jechali spačatku dobra, a potym, jak pajechali ŭzdoŭž kanała, usio chutčej i chutčej. Ja zaniepakoiłasia, skazała, kab cišej jechaŭ. Jon nie spyniaŭsia, tady jašče paśpieła dvojčy kryknuć, kab tarmaziŭ. I ŭsio. Mašyna zvalvajecca ŭbok i my valimsia ŭ kanał», — sa ślaźmi raskazała Kaciaryna.

Dalejšy jaje apovied z zali było čuvać uryŭkami. Pamiataje, jak ubačyła dačku na padłozie aŭtamabila, vady tady było ŭžo pa pojas. Paciahnułasia za małoj, ale tut jaje vadoj paciahnuła nazad (usie, chto vyratavaŭsia, vybralisia praź dźviery ŭ bahažniku).

Kaciaryna pamiataje, jak ŭspłyła na pavierchniu, ŭbačyła nad hałavoj sonca, ale jaje znoŭ paciahnuła na dno. Torba i vopratka pieraškadžali płyć. Kali vybrałasia na bierah, pavodle paciarpiełaj, tam siadzieŭ Andrej Bukraba i nie sprabavaŭ dapamahčy ratavać dziaciej.

Sam kiroŭca na dopycie kazaŭ, što, jak addychaŭsia, to taksama sprabavaŭ nyrać, ale «nie chapała pavietra, navat nie dastaŭ da aŭtamabila». Tak heta ci nie, mahčyma, stanie viadoma paśla dopytu śviedak.

Jakoha pakarańnia prosicie da padsudnaha?

Pavodle zakonu paciarpieły moža vykazać sudu svaju dumku pra toje, jak varta pakarać vinavataha. Takoje pytańnie sud zadavaŭ Kaciarynie Bycko, a paśla jaje Valancinu Biernackamu (bratu zahinułaj Iryny Biernackaj) i Irynie Tałściak, maci zahinułaha Paŭła Tałściaka.

Usie paciarpiełyja vykazalisia za samaje žorstkaje pakarańnie, jakoje dazvalaje zakon. Słuchać Kaciarynu Bycko było asabliva ciažka. Maładaja žančyna paviarnułasia da žaleznaj kletki, u jakoj trymajuć padsudnaha, i skazała, što patapiła b jaho ci rasstralała, kali b takoje było mahčyma, bo jon «złamaŭ usio jaje žyćcio».

Jak raniej stała viadoma ad Andreja Bukraby, ź SIZA jon pisaŭ listy paciarpiełym, u jakich prasiŭ jamu daravać, bo «heta zdaryłasia nie naŭmysna». Ale Kaciaryna Bycko advierhła hetyja listy.

«Lepš by ty i nie pisaŭ, ja ničomu nia vieru, napisaŭ pad dyktoŭku toje, što treba. Prapadzi z majho žyćcia», — kinuła paciarpiełaja ŭ vočy padsudnaha.

Maci zahinuła Paŭła Toŭścika Iryna vykazałasia hetak: «Jon pakazvaŭ, što haspadar žyćcia, što jamu ŭsio dazvolena». Pavodle žančyny, jakaja i ŭ sud pryjšła z žałobnym šalikam, jana rabiła zaŭvahu synu za siabroŭstva z Andrejem Bukrabam. «Jamu samomu nie kazała, a synu kazała. Što hety pryjaždžaje da ich domu ŭvieś čas z hučnaj muzykaj i nikoli nia ścišyć. Što demanstruje niepavahu na navakolnych». Karani zdareńnia, jakoje adbyłosia 7 lipienia na kanale, pavodle Iryny Tałściak, u takich pavodzinach padsudnaha.

Pavodle pakazańniaŭ Kaciaryny Bycko, Andrej Bukraba «piŭ usiu noč», i ŭ hetym treba šukać asnoŭnuju pryčynu jahonych pavodzin za rulom. Joj pra heta raskazaŭ miascovy taksist, jaki vaziŭ niećviarozaha chłopca ź siabram pa horadzie da 6 ranicy.

Advakat padsudnaha Andreja Bukraby ahučyŭ źviestki, što ŭ pačatku vieraśnia paciarpiełym ŭ spravie byli pieraličanyja hrašovyja srodki ŭ jakaści padtrymki: 2, 4 i 4 tysiačy rubloŭ.

Baćka Andreja Bukraby admoviŭsia havaryć z karespandentam Svabody. «Nijakich kamentaroŭ davać nia budu».

Praces u Biarozaŭskim sudzie adnovicca 10 kastryčnika. Pavodle sakratara sudu, na pracesie zasłuchajuć śviedak.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?