Ranicaj 2 kastryčnika ŭ haradskim pasiołku Azaryčy (Homielskaja vobłaść) pracavali milicyja i śledčyja. Była zabitaja 42-hadovaja žančyna, a jaje muž-śviatar zatrymany. Pra heta TUT.BY raspaviali miascovyja žychary. Aficyjna źviestki pra złačynstva paćvierdzili ŭ Śledčym kamitecie.
Miascovyja žychary raspaviali, što siońnia ranicaj u Azaryčach była zabitaja žančyna. Jaje cieła z nažavymi ranieńniami znajšli va ŭłasnym domie.
Milicyja zatrymała muža zabitaj, vidavočcy kažuć, što «vyhladaŭ jon ahałomšanym».
Što adbyłosia — pakul nie jasna. Mužčynu viedajuć u Azaryčach jak baciušku miascovaha chrama ŭ honar śviatych apostałaŭ Piatra i Paŭła. Tut jon słužyć šmat hadoŭ.
Ludzi kažuć, byccam by ab trahiedyi paviedamiŭ orhanam sam mužčyna. A pierad hetym patelefanavaŭ synu.
«Idzie śledstva, my aficyjnaj infarmacyjaj nie vałodajem. Ale tak, adbyłosia zabojstva, a mužčyna zatrymany. Niezrazumieła, što zdaryłasia», - kaža staršynia miascovaha sielsavieta Halina Pancialejenka.
Viadoma, što ŭ siamji dvoje darosłych dziaciej, ale jany žyvuć asobna — para žyła ŭ domie adna.
Paźniej pres-słužba Śledčaha kamiteta paćvierdziła: rasśledujecca sprava ab zabojstvie ŭ Kalinkavickim rajonie.
«Pa padazreńni ŭ ździajśnieńni złačynstva zatrymany 47-hadovy muž zabitaj žančyny. Pry zatrymańni pa miescy žycharstva jon znachodziŭsia ŭ stanie ałkaholnaha apjanieńnia. Zaraz ź im pracujuć śledčyja», — raspaviali ŭ viedamstvie.
Zaviedziena kryminalnaja sprava pa č.1 art. 139 Kryminalnaha kodeksa (Zabojstva). Ciapier dapytvajuć svajakoŭ i susiedziaŭ šlubnaj pary. Pryznačany šerah ekśpiertyz.
