Fota Nadziei Bužan
Adkazvajučy na pytańnie Hanny Kanapackaj pra toje, jak urad pa daručeńni kiraŭnika krainy płanuje pavialičyć VUP da 100 miljardaŭ dalaraŭ, premjer-ministr prapanavaŭ joj papracavać va ŭradzie, piša Tut.by.
Padčas nulavoha čytańnia biudžetu ŭ parłamient Hanna Kanapackaja pacikaviłasia, jak płanuje ŭrad dasiahnuć pastaŭlenaj zadačy ŭ 100 miljardaŭ dalaraŭ VUP.
— Treba pryznać, što siońnia ŭrad drenna pracuje nad vykanańniem hetaj zadačy, — nie staŭ chavać premjer-ministr Siarhiej Rumas. — Niahledziačy na ŭsie našy namahańni, ekanomika raście nie takimi tempami, jakija dazvolać vyrašyć hetuju zadaču. I absalutna spraviadliva ŭrad krytykujuć inšyja dziaržaŭnyja orhany, nieabyjakavyja deputaty, ekśpierty za toje, što ekanomika drenna raście.
Pa słovach Rumasa, va ŭradzie jość roznyja scenary — «navat z ulikam takoha nie vielmi dobraha 2019 hoda, jakija pavinny być tempy rostu ekanomiki, kab dasiahnuć hetaj zadačy».
— Siońnia absalutna vidavočna, što ekanomika ŭ ciapierašnim jaje stanie, tradycyjnaja ekanomika, nie zdolnaja hienieravać taki VUP. U nastupnaj piacihodcy spatrebicca vialikaja praca pa strukturnych źmienach dla taho, kab my stvaryli novyja haliny ekanomiki, jakija dazvolać hetaha dasiahnuć.
Siarhiej Rumas pačuŭ u pytańni Kanapackaj «padtekst, što vy viedajecie, jak vyrašyć hetuju zadaču».
— Ja tak razumieju, što vy, jak i ŭrad, taksama nie vielmi dobra zrabili svaju pracu pa zbory podpisaŭ, i ŭ nastupnym parłamiencie nie budziecie pradstaŭleny, — źviarnuŭsia premjer da Kanapackaj, jakuju nie zarehistravali kandydatam. — Ja aficyjna vas zaprašaju na pracu va ŭrad, kab vy dapamahli nam vyrašyć hetuju zadaču.
Hanna Kanapackaja za zaprašeńnie padziakavała.
— My tady z vami pahavorym pra heta asobna.
