Apošnija niekalki miesiacaŭ žyćcia likvidavany vajennymi ZŠA lider terarystyčnaj arhanizacyi «Isłamskaja dziaržava» Abu Bakr al-Bahdadzi bajaŭsia zdradnikaŭ, chavaŭsia pad ziamloj i časam pieraapranaŭsia ŭ pastucha. Pra heta paviedamlaje Associated Press.

Pavodle infarmacyi ahienctva, jon trymaŭ u rabstvie dziaŭčynku-padletka ź liku jezidaŭ — narodnaści kurdskaj etničnaj hrupy, — jakuju vyzvalili padčas apieracyi pad kiraŭnictvam ZŠA ŭ mai. Jana raspaviała, što vierchavod ID pierasoŭvaŭsia ŭ supravadžeńni siami paplečnikaŭ, a niekalki miesiacaŭ tamu pieradaŭ bolšuju častku svaich paŭnamoctvaŭ starejšamu namieśniku, imia jakoha nie nazyvajecca.

Pavodle jaje słoŭ, upieršyniu al-Bahdadzi sprabavaŭ źbiehčy ŭ siryjskuju pravincyju Idlib ŭ kancy 2017 hoda. Dziaŭčynku razam ź lidaram ID, jaho žonkaj i bližejšym atačeńniem u kałonie z troch aŭtamabilaŭ adpravili ŭ pravincyju, adnak było vyrašana viarnucca ź mierkavańniaŭ biaśpieki. Padletak raspaviała, što paśla hetaha jana čatyry miesiacy znachodziłasia ŭ domie cieścia al-Bahdadzi i jaho bližejšaha paplečnika Abu Abduły al-Zubajie ŭ horadzie Dašyša. Pavodle jaje słoŭ, lidar ID časta naviedvaŭ jaje tam i hvałtavaŭ. Uviesnu 2018 hodu dziaŭčynku padaryli inšamu mužčynu, jaki vyviez jaje z horada, — heta byŭ apošni raz, kali jana bačyła al-Bahdadzi. Paźniej samaabvieščany chalif dasłaŭ joj u padarunak upryhožvańnie.

Miarkujecca, što paśla hetaha al-Bahdadzi pierajazdžaŭ ź miesca na miesca na ŭschodzie Siryi, byŭ niervovym i skardziŭsia na zdradnikaŭ. Akramia taho, krynicy ahienctva raspaviali, što lidar ID pastajanna nasiŭ pojas śmiarotnika, prymušaŭ rabić heta svaich paplečnikaŭ i nie karystaŭsia mabilnym telefonam. Pastajanny stres pahoršyŭ dyjabiet al-Bahdadzi — jamu ŭvieś čas davodziłasia sačyć za ŭzroŭniem cukru ŭ kryvi i prymać insulin. Z-za hetaha jon nie moh vykonvać post u śviaty dla musulman miesiac Ramadan i zabaraniaŭ paścicca svaim paplečnikam.

Krynicy va ŭradzie ZŠA raspaviali, što nie viedali, kali al-Bahdadzi prybyŭ u Idlib, adnak adznačyli, što jon vybraŭ hetaje miesca, bo heta była adzinaja terytoryja, niepadkantrolnaja siryjskamu ŭradu. 

Prezident ZŠA Donald Tramp 27 kastryčnika paviedamiŭ ab likvidacyi Abu Bakr al-Bahdadzi. Pavodle jaho słoŭ, u vyniku śpiecapieracyi byli taksama źniščanyja jaho pamočniki i značnaja kolkaść bajevikoŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?