Navukoŭcy vyśvietlili, što son upłyvaje na ŭzrovień dabrabytu, piša BBC.
Daśledčyki ŭ ZŠA vyśvietlili, što tyja, chto śpiać usiaho na adnu hadzinu daŭžej na praciahu tydnia, u siarednim zarablajuć na 4,9% bolš za svaich kaleh, chto vykonvaje tuju ž pracu.
Jość šmat teoryj, čamu tak adbyvajecca, ale asnoŭnaja takaja, što rabotniki, jakija dobra adpačyvajuć, bolš praduktyŭnyja.
Kali ludzi prychodziać na pracu paśla dobraha snu, to jany i adčuvajuć siabie lepš, i lepš pracujuć.
Viadoma, nie ŭsio tak prosta. Kali vy budziecie pozna ŭstavać i spaźniacca na pracu, to vaš pracadaŭca naŭrad ci budzie hetym zadavoleny, što ŭ vyniku moža adbicca na zarpłacie. Ź inšaha boku, niedasyp pryvodzić da stresu, a ŭsim viadoma, što stres źnižaje praduktyŭnaść.
Son šmat u čym kantralujecca cyrkadnymi rytmami, jakija taksama nazyvajuć bijałahičnymi hadzińnikami. Bolšaść ludziej pračynajecca prykładna ŭ adzin čas, bo ŭsim treba iści na pracu, u škołu i hetak dalej.
Ale zasynajuć ludzi ŭ rozny čas, u zaležnaści ad zachodu sonca. Navukoŭcy vyrašyli razhledzieć pavodziny i dachody amierykancaŭ, jakija žyvuć u adnym hadzinnym pojasie.
Vyśvietliłasia, što tyja, chto žyvie va ŭschodniaj častcy adnaho hadzinnaha pojasa, kładucca spać prykładna na hadzinu raniej tych, chto žyvie ŭ zachodniaj častcy, i, adpaviedna, śpiać trochi daŭžej. Hetyja ž ludzi zarablajuć bolš, čym tyja, chto robić tuju ž pracu, ale niedasypajuć.
Daśledavańni taksama pakazvajuć, što tyja, chto śpiać usiaho pa šeść hadzin u sutki na praciahu dvuch tydniaŭ, demanstrujuć tyja ž vyniki, što i ludzi, jakija naohuł nie spali pa dvoje sutak zapar.
Niekatoryja kampanii taksama zaŭvažyli ŭpłyŭ snu na praduktyŭnaść. Google, Facebook i niekatoryja inšyja bujnyja kampanii dajuć supracoŭnikam miesca, dzie tyja mohuć niadoŭha paspać padčas pracoŭnaha dnia.
