Natalla Adamovič sa skulptaram Henikam Łojkam la biusta Alesia Adamoviča.
Biust Alesia Adamoviča (1927—1994) paŭstaŭ la doma kultury ŭ pasiołku Hłuša, dzie Adamovič vyras i dzie jon pachavany, paviedamlaje Svaboda.org. Pomnik kaštavaŭ 13 tysiač rubloŭ, jakija byli sabranyja pa inicyjatyvie žychara Babrujska Andreja Archipienki. Jaho aŭtary — skulptary Henik Łojka i Jaŭhien Bilej.
9 listapada ŭ Hłušu, što za 20 kiłamietraŭ ad Babrujska, sabralisia rodnyja i ziemlaki Adamoviča, a taksama ludzi z Babrujska, Mahilova, Minska, kiraŭniki Babrujskaha rajvykankama.
Dačka piśmieńnika Natalla Adamovič kala biusta raspłakałasia.
Staršynia Hłušanskaha sielsavieta Maryja Suščanka, Natalla Adamovič płača, a sprava — inicyjatar ustalavańnia biusta Andrej Archipienka.
«Heta zasłuha moładzi, jakaja sabrała hrošy i damahłasia ŭstalavańnia pomnika, — kaža Natalla Adamovič. — Ja dapamahała paradami i fotazdymkami. Ja rada, što jość u nas takaja moładź. Moža ź joj i da adkryćcia muzieja dojdziem. Sioleta 25 hadoŭ jak niama majho taty i tak vyjšła, što ŭ hety hod źjaviŭsia ŭ jahonaj rodnaj Hłušy jahony biust».
Andruś Archipienka adznačaje, što ažyćciavić zadumanaje biez padtrymki Hłušanskaha sielskaha savieta nie ŭdałosia b.
Načalnik adździeła ideałahičnaj pracy Babrujskaha rajvykankama Halina Čarnova ličyć, što lepšaha miesca dla biusta Adamoviča, čym placoŭka la Doma kultury, u pasiołku niama. «Ja ščaślivaja, što staić hety biust», — skazała jana.
Pa słovach Haliny Čarnovaj pytańnie pra stvareńnie muzieja zastajecca aktualnaje, ale na dabračynnym rachunku, adkrytym u 2016 hodzie, sabrana zamała hrošaj, kab adramantavać avaryjny budynak. Pavodle čynoŭnicy, ciapier prapracoŭvajecca varyjant raźmiaščeńnia ŭ Domie kultury ekspazicyi pra žyćcio i tvorčaść Alesia Adamoviča.
Na ramont staroj apteki, dzie miarkujecca raźmiaścić muziej Adamoviča, 5000 dalaraŭ achviaravała Nobieleŭskaja łaŭreatka Śviatłana Aleksijevič. Ale heta tolki dziasiataja častka patrebnych na ramont srodkaŭ. U toj aptecy pracavała maci Alesia Adamoviča. Chata ž, dzie Adamovič naradziŭsia, zhareła ŭ vajnu.
Staršynia Hłušanskaha sielskaha savieta Maryja Suščanka nazyvaje biust Adamoviča «narodnym pomnikam».
