Rasiejskija ŭłady daŭno chacieli ŭziacca za biełarusaŭ i inšych zamiežnikaŭ, jakija zastajucca biespakaranymi, choć pieravyšajuć chutkaść na rasijskich darohach, što fiksujuć kamiery fotafiksacyi.

Jašče b: pryncyp niepaźbiežnaści pakarańnia, pa sutnaści, nie pracavaŭ, i možna tolki ŭjavić, jakija sumy hublaŭ biudžet Rasii z-za niespahnanych ź inšaziemcaŭ štrafaŭ. Ale, padobna, usio mianiajecca.

Surazmoŭca abw.by Alaksandr raspavioŭ, što biełarusaŭ u Rasii pa kamierach pačali štrafavać pačkami. Dla hetaha supracoŭniki DIBDR spyniajuć aŭto ź biełaruskimi numarami na stacyjanarnych pastach. Asabista jon sam u pačatku listapada byŭ spynieny inśpiektaram i atrymaŭ adrazu 9 pastanoŭ na vypłatu štrafu (usie adskanavanyja dakumienty aŭtamabilist dasłaŭ u redakcyju Aŭtabiznesu). Byli uličany ŭsie pieravyšeńni chutkaści, dapuščanyja im za dva apošnija miesiacy. Bolš rannija parušeńni zaličany nie byli.

Alaksandr raspavioŭ «Aŭtabiznesu»:

— Ja biełarus, pracuju ŭ Maskvie i na vychodnyja časta jezdžu ŭ Biełaruś. Viadoma, dzieści i parušaju. Płynia aŭto ź Biełarusi ŭ Maskvu i nazad vielmi vialikaja i ŭ budni, i ŭ vychadnyja: heta i lehkavy transpart, i hruzaviki, i mikraaŭtobusy… Baču, što za biełarusaŭ DIBDR uziałasia vielmi surjozna. Pastupiła, mabyć, rasparadžeńnie spyniać zamiežnikaŭ i składać pastanovy za parušeńni, zafiksavanyja kamierami.

Mianie pieršy raz spynili 4 listapada na trasie M1 u Maskoŭskaj vobłaści na pieršym paście, adrazu paśla Haharyna pa darozie ź Biełarusi. Inśpiektar, jaki mianie afarmlaŭ, kudyści telefanavaŭ (jak potym vyśvietliłasia, u centr videafiksacyi DIBDR HU MUS pa Maskoŭskaj vobłaści), vysyłaŭ skany maich dakumientaŭ (pravy, pašpart, techpašpart), a adtul u adkaz praź niejkuju prahramu pryjšli pratakoły. U vyniku akazałasia, što kamiery ažno 9 razoŭ zafiksavali majo pieravyšeńnie chutkaści za dva apošnija miesiacy, pieršaje datavana 16 vieraśnia.

Viadoma, ja parušaŭ i raniej, ale ŭličyli tolki parušeńni za dva apošnija miesiacy. Adpaviedna, było aformlena 9 pastanoŭ. Štrafy — 500 i 1000 rasijskich rubloŭ u zaležnaści ad taho, nakolki była pieravyšanaja chutkaść. Ahulnaja suma — 6000 rubloŭ (prykładna 200 biełaruskich rubloŭ — NN).

Na paście pierada mnoj afarmlali chłopcaŭ, taksama biełarusaŭ, jakija zajmajucca kamiercyjnym voźnictvam, — u ich až 15 pratakołaŭ akazałasia za dva miesiacy! Na ščaście, u Rasii isnujuć źnižki dla parušalnikaŭ: pry vypłacie štrafu nie paźniej za 20 dzion z dnia vyniasieńnia pastanovy jaho suma ŭ dva razy mienšaja. Jašče rasijskaje zakanadaŭstva łajalna ŭ tym, što kali dazvolenaja chutkaść, skažam, 70, to plus 20 kiłamietraŭ u hadzinu ty možaš jechać biespakarana, za 90 u hetym vypadku nichto nie aštrafuje. Ale asabista ŭ mianie, kajusia, inšyja ličby: ja jezdžu daŭno i prykładna viedaju, dzie niama ludziej i možna «prytapić».

Na paście ŭ toj dzień sabrałasia cełaja čarha ź biełarusaŭ: za mnoj było jašče 3 ci 4 čałavieki.

Cikava, što 11 listapada ja viartaŭsia na pracu ŭ Maskvu — znoŭ tarmazili ŭsich biełarusaŭ, mianie ŭ tym liku. Ja ŭžo padrychtavaŭsia, uziaŭ z saboj pastanovy. Inśpiektar, kali ŭbačyŭ ich, skazaŭ: «Nu, svabodny!» A tak stajała 3—4 aŭto biełaruskija.

Inśpiektar patłumačyŭ, što jany pačali pracu z 1 listapada, zaraz takaja praktyka budzie pastajanna — da Novaha hoda dali kamandu abkatać sistemu. Pavodle jaho słoŭ, z 1 studzienia 2020 hoda pastanovy buduć dasyłać biełarusam na dom. Nibyta ŭ ich užo jość dostup da bazy aŭtamabilaŭ, zarehistravanych u Biełarusi.

«My bačym, chto ŭładalnik, i budziem adsyłać pastanovu pa miescy jaho žycharstva ŭ Biełarusi. Tak što rasijskija štrafy budziecie apłačvać ŭžo doma, u Biełarusi», — skazaŭ mnie inśpiektar. Budzie takoje ci nie, jak kažuć, pažyviom — pabačym.

U Maskvie kamier vielmi šmat, tam ja starajusia nie parušać, pryčym jany łoviać nie tolki na chutkaść, a fiksujuć roznyja parušeńni, jak, naprykład, zajezd za stop-liniju, pierasiačeńnie sucelnaj linii raźmietki, prajezd na čyrvonaje śviatło i h.d. Inśpiektar skazaŭ, što Maskva — heta asobny rehijon, tam i buduć vynosicca pastanovy.

Jak piša Aŭtabiznes, prymusić biełarusaŭ i inšych zamiežnikaŭ płacić štrafy za parušeńni, zafiksavanyja kamierami chutkaści, — daŭniaja mara rasiejcaŭ. Jašče ŭ 2017 hodzie sa spasyłkaj na DIBDR «Kommiersant» pisaŭ, što pravaachoŭnyja orhany Rasii, Biełarusi i Kazachstana naładziać abmien infarmacyjaj ab parušalnikach.

«U vypadku kali parušeńnie fiksujecca ŭ aŭtamatyčnym režymie, štraf kiroŭcu, zarehistravanamu na terytoryi krain Mytnaha sajuza, nie prychodzić. Sistema fotavideafiksacyi ŭ Rasiei choć i raspaznaje numar aŭtamabila, nie vałodaje dadzienymi ab uładalniku, a značyć, nie moža vysłać «list ščaścia». Akramia taho, parušeńnie chutkasnaha režymu nie ŭvachodzić u pieralik uzajemnapryznavanych parušeńniaŭ, zamacavanych u kanviencyi 1997 hoda. Dla vyrašeńnia hetaj prablemy, jak rastłumačyli «Kommiersantu» ŭ DIBDR, i patrebny dostup da bazy dadzienych biełaruskich pravaachoŭnych orhanaŭ (DAI Respubliki Biełaruś) i MUS Kazachstana». Heta značyć, zaraz, miarkujučy pa ŭsim, dostup u rasiejcaŭ da bazy biełaruskich aŭto jość, ale dadomu pastanova pakul što nie adsyłajecca, a afarmlajecca prosta na darozie.

Toje, što biełarusaŭ za parušeńni PDR u Rasiei pačnuć štrafavać ŭžo ŭ pieršym paŭhodździ hetaha hoda, zajaŭlaŭ u sakaviku 2019-ha kiraŭnik DIBDR Michaił Černikaŭ. Tady ž była praviedziena kalehija ź Biełaruśsiu pa infarmacyjnym uzajemadziejańni i abmienie Praviłami darožnaha ruchu.

«I ŭsie tyja parušeńni PDR jak u Biełarusi, tak i ŭ Rasii praz 70 sutak buduć pieradadzieny na terytoryju toj krainy, dzie pražyvaje toj ci inšy hramadzianin, — heta spahnańnie ŭ prymusovym paradku štrafaŭ», — skazaŭ Černikaŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?