Na svajoj vialikaj pres-kanfierencyi prezident Rasii Uładzimir Pucin źviarnuŭ uvahu na dziaŭčynu z płakacikam «Minsk, Biełoruśsija» i prapanavaŭ dać joj słova. Praŭda, taja akazałasia rasijskaj žurnalistkaj, i jaje pytańni nie asabliva tyčylisia našaj krainy.

«Minsk, Biełoruśsija» — Pucinu zadała pytańnie psieŭdabiełaruskaja žurnalistka

«Naša Niva» źviazałasia z Maryjaj Nahibinaj — tak zavuć dziaŭčynu. Joj 23 hady, pracuje ŭ maskoŭskim filijale jekaciarynburhskaha telekanała «Ministerstva idej».

Nahibina rastłumačyła nadpis na płakaciku nastupnym čynam:

«Nas cikaviła pytańnie terytaryjalnaj cełasnaści paśla 1991 hoda, u tym liku i datyčna Biełarusi. Čamu nie pravodziłasia raśledavańnie dziejańniaŭ Harbačova, paśla jakich źjaviłasia šmat paciarpiełych? Ciapier u Rasii i inšych krainach postsavieckaj prastory masava źbirajucca podpisy, kab praviali raśledavańnie dziejańniaŭ Harbačova, dali padziejam 1991 hoda pravavuju adznaku. Rašeńni Harbačova, kali jon addaŭ suvierenitet respublikam — ci zakonna heta było? Chaj vyrašyć śledstva.

Tamu na płakaciku była tema pytańnia, a nie hieahrafija pachodžańnia telekanała. Było napisana «Biełoruśsija», a nie «Biełaruś», bo mnie niejak zručniej i pryvyčniej tak kazać».

Dziaŭčyna kaža, što joj cikava było zadać svajo pytańnie, bo ciapier Biełaruś i Rasija abmiarkoŭvajuć «darožnyja karty» (praŭda, nie patłumačyła, jakim čynam jaje pytańnie zakranaje hetaje abmierkavańnie). Sama jana kaža, što vitaje intehracyju Biełarusi i Rasii.

«Padumajcie sami, Rasija i Biełarusija — adziny narod. Ja liču, što heta tak. Ja liču, što miežy 1945 hoda, jakija adstajali našyja prodki, nieparušnyja. Biełaruś — takaja ž ajčyna, jak Rasija, jak Kijeŭ, jak i ŭsia postavieckaja prastora, tamu mianie cikavić hetaja tema. Heta sakralnyja kaštoŭnaści Ajčyny», — kaža Maryja.

Dziaŭčyna kaža, što jana zvyčajny karespandent kanała «Ministerstva idej», pracuje ŭ maskoŭskim filijale. Pa jaje słovach, achop u kanała — 10 miljonaŭ čałaviek (kali što, nasielnictva Jekacierynburha — kala 1,4 miljona čałaviek, va ŭsioj Śviardłoŭskaj vobłaści žyvie trochi bolš za 4 miljony).

Jana paćviardžaje, što źjaŭlajecca aktyvistkaj «Nacionalno-osvoboditielnoho dvižienija».

«Ja prymaju aktyŭny ŭdzieł u infarmavańni nasielnictva pa tych ci inšych palityčnych pytańniach», — tak Nahibina tłumačyć svaju dziejnaść u «NOD». «Infarmuje nasielnictva» jana praz svoj videabłoh.

Adkazam Pucina na svaje pytańni Maryja zadavolenaja častkova. Sa słovami, što hałoŭnaja ideałohija Rasii siońnia — heta patryjatyzm, jana poŭnaściu salidarnaja. Ale, kaža, całkam na pytańni rasijski kiraŭnik nie adkazaŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?