Svaboda parazmaŭlała z kłasnaj kiraŭnicaj i adnakłaśnikami chłopca, jaki raźmiaściŭ na Youtube zvarot i ŭziaŭ na siabie adkaznaść za napad na milicyjantaŭ u Vierchniadźvinsku.

Aficyjnaj infarmacyi pra asobu napadnika i padrabiaznaściaŭ pra zdareńnie niama.

Aŭtaru videa H. 18 hadoŭ. Jon sa Smarhoni i letaś skončyŭ škołu.

Alena Jaŭhienaŭna, byłaja kłasnaja kiraŭnica H., vielmi zasmučanaja navinami pra chłopca.

«Ja ščyra škaduju, što jaho nichto nie spyniŭ. Jon z narmalnaj siamji. Maci pracuje. Na žal, baćki raźvialisia, ale ciapier takich siemjaŭ šmat, i heta nie padstava kazać, što jamu niečaha nie chapała».

Jak daviedałasia Svaboda, baćka H. — pradprymalnik Juryj. Jon uładalnik niekalkich kramaŭ u Smarhoni.

Alena Jaŭhienaŭna kaža, što H. nie moh naładžvać adnosiny z adnakłaśnikami, nie mieŭ siabroŭ. Jon pamianiaŭ niekalki škoł i ŭ kłasie Aleny Jaŭhienaŭny vučyŭsia apošnija dva hady.

«Heta byŭ vajenna-patryjatyčny klas. My spadziavalisia, što jamu budzie cikava. H. zaŭždy zachaplaŭsia historyjaj. U jaho treciaje miesca na abłasnoj alimpijadzie pa historyi ŭ 11-j klasie. My vielmi hanarylisia im. Ale ź inšymi dziećmi ŭ jaho anijakich kantaktaŭ nie było. Absalutna. Jon sam pa sabie, taki voŭk-adzinočka».

Znajomyja ŭ razmovie sa Svabodaj charaktaryzujuć H. jak ahresiŭnaha čałavieka.

«Hety chłopiec byŭ vielmi zakryty! Tamu my nie kantaktavali, i ja jaho nie viedaŭ! Ale ŭ škole jon časta pahražaŭ nam. My ličyli, što heta ŭsio žart», — raspaviadaje były adnakłaśnik H.

Alena Jaŭhienaŭna kaža, što ź im było ciažka pracavać, u jaho ŭvieś čas byli kanflikty z adnakłaśnikami i nastaŭnikami. «Niepakładzisty, nieadaptavany da žyćcia ŭ hramadstvie», — kaža pra byłoha vučnia nastaŭnica.

«Vielmi intelektualna raźvity, pramy, zusim nie ŭmieje chitravać. U mianie takoje pačućcio, što jon nie hetaha času dzicia. Kali b jon žyŭ u XVII stahodździ, biŭsia b na duelach, moža, u bolš demakratyčnym hramadstvie siabie niejak prajaŭlaŭ… Ale ŭ hetym hramadstvie jamu było vielmi niekamfortna».

Pavodle słovaŭ inšaha adnakłaśnika, H. hulaŭ u kampjutarnuju hulniu Counter-Strike, chadziŭ u muzyčnuju škołu i hraŭ na hitary.

«Jon sam vielmi razumny. Pieramahaŭ na alimpijadach. Ale pa adznakach, što było dziŭna, u jaho nie vielmi dobra ŭsio było. Jon viedaŭ, jak što rabić, ale nie rabiŭ. Jon tupa siadzieŭ i nie pisaŭ. Zaŭsiody ŭ škołu spaźniaŭsia chvilin na 20, kožny dzień, redka kali svoječasova prychodziŭ. Jaho mama kazała, što heta z pryčyny taho, što jamu nie padabałasia, kali na jaho ŭsie hladziać. Maŭlaŭ, ranicaj šmat ludziej u škole», — kaža znajomy H.

Jon dadaje, što siabroŭ u H. nie było.

«Byli ŭmoŭnyja. Adnakłaśniki ź inšaj škoły, ź jakimi jon paru słovami pierakinuŭsia i ŭsio».

Alena Jaŭhienaŭna miarkuje, što ŭ H. byli nie takija prostyja adnosiny z maci. U siamji taksama jość darosły starejšy brat. Adnak H. zaŭždy byŭ dahledžanym dziciom, maci aktyŭna cikaviłasia jaho žyćciom. Baćku H. kłasnaja kiraŭnica nikoli nie bačyła i nie viedaje, ci padtrymlivaje jon adnosiny z chłopcam. Pavodle jaje źviestak, baćki H. raźvialisia, kali toj vučyŭsia ŭ 5-j kłasie. Pakul Svabodzie nie ŭdałosia źviazacca ź imi.

Vučyŭsia H. dobra. Paśla škoły nibyta pastupiŭ u Połacki ŭniviersitet (heta paćvierdzić nie ŭdałosia — RS). Dzie jon moh paznajomicca ź idejami, jakija padšturchnuli jaho da hetaha ŭčynku, nastaŭnica navat nie ŭjaŭlaje.

«Adzinočka», — kaža pra H. byłaja nastaŭnica. — Niejkaja niervovaść u im była, sum u vačach. Mahčyma, navat niešta na ŭzroŭni psichiki. Heta było prablemnaje dzicia».

Alena Jaŭhienaŭna vielmi škaduje pra toje, što zdaryłasia z byłym vučniem.

«Jon moh by stać vučonym, zrabić karjeru. A ciapier heta pałamany los na samym uźlocie — ci turma, ci psichuška».

Milicyja nastaŭnicu jašče nie apytvała.

Ranicaj 1 studzienia źjaviłasia infarmacyja, što 18-hadovy chłopiec pry zatrymańni raniŭ dvuch supracoŭnikaŭ Departamienta achovy. Paźniej znajšoŭsia videazvarot H. na Youtube, a taksama kanał u Telegram. Pavodle niepaćvierdžanaj infarmacyi, pierad zatrymańniem chłopiec kinuŭ u budynak Vierchniadźvinskaha departamienta achovy butelku z padpalnaj vadkaściu.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?